Ўзбекистон: Путинни танқид қилувчи қизиқчи Данила Поперечный микрофони Тошкентда ўчириб қўйилдими? Dunyo Yangiliklar

Россиялик таниқли стендап-комик Данила Поперечный Тошкентда ўтган концертида маҳаллий ҳуқуқ-тартибот органлари томонидан цензурага учраганини даъво қилган.

Янгиликлар. Ўзбекистон: Бугун Путинга "Йўқ", дейиш хавфлими? Россия ва Марказий Осиё. Видео

Ўзбекистон: Путинсевар раққос Тошкентда урушга чорловчи қўшиқ цензура қилинганини иддао этиб чиқди

Янгиликлар. Ўзбекистон: Шавкат Мирзиёев қудратларга кескин кетди, нима учун “ўлишга тайёр” эканини ҳам айтди

28 яшар қизиқчининг Instagram'даги ўз саҳифасида ёзишича, ҳазиллар "долзарб кун мавзусига билвосита тегиб ўтган тақдирда ҳам микрофон ўчириб қўйилган".

"Улар, ҳатто, концертнинг очилиш қисмида "Россия" сўзи оддий маънода ишлатилган ҳазилни ҳам бирор келишувсиз, ўз билганича ўчириб қўйишди", дея ёзган Поперечный.

14 март куни ўтган концертга тушганини айтган бир қанча ўзбекистонликлар ижтимоий тармоқдаги муҳокамаларда Поперечный саҳнада "уруш", "Путин", "сафарбарлик" каби сўзларни тилга олиши билан микрофон ўчиб қолгани ҳақида ёзган.

Стендап-комикнинг ўзи, умуман олганда, Ўзбекистон ҳуқуқ-тартибот органлари "кўрсатмаси билан" концертнинг "камида 50 дақиқаси овозсиз ўтган"ини иддао қилган.

Кремлнинг Украинага босқини ортидан урушни қоралаб, Россияни тарк этган Поперечныйнинг бу даъволари президент Шавкат Мирзиёев Ўзбекистон ким томонда, деган "оғир савол"га жавоб беришидан атиги бир кун ўтгач янграган.

"Ўзимни ўз уйимдагидек ҳис қилдим"

Данила Поперечный ўзининг "Қувноқ/ҳаёт" номли янги стендап дастури билан давом этаётган халқаро гастроль доирасида 14 март куни пойтахт Тошкентдаги "Алпомиш" муз саройида саҳнага чиққан.

Аммо унинг даъво қилишича, маҳаллий ҳуқуқ-тартибот органлари ходимлари концертдаги "дунёда бўлаётган ҳодисаларга қайсидир жиҳатдан боғлиқ материалнинг барчасини кесиб ташлаган".

"Том маънода ҳар сафар ҳазил ёки мавзу долзарб кун тартибига билвосита тақалган пайти саҳнадаги чиқишим вақтида микрофонни шунчаки ўчириб қўйдилар. Ҳатто, концертнинг очилиш қисмида "Россия" сўзи оддий маънода ишлатилган ҳазилни ҳам бирор келишувсиз, ўз билганича ўчириб қўйишди", билдирган қизиқчи.

"Ўзимни ўз уйимдагидек ҳис қилдим", дея қўшимча қилган Россияда Украина урушига боғлиқ мустақил чиқишлар ва маданий тадбирлар қаттиқ цензурага учраётганига ишора этган Поперечный.

Қизиқчи концерт тўлақонли ўтмагани учун томошабинлардан узр сўраган ва истовчиларга чипта пулини қайтариб беришга тайёр эканини таъкидлаган.

"Айни вақтда дастурни бундай кўринишда томоша қилган ягона шаҳарсиз", ёзган Поперечный тошкентликларга қарата.

Қандай ҳазиллар бўлган эди?

Поперечный концертнинг "камида 50 дақиқаси" норасмий цензурага учраганини даъво қилган бўлсада, микрофон айнан қандай ҳазиллар ортидан "ўчириб қўйилгани"га ойдинлик киритмаган.

Шунингдек, стендап-комик Instagram'даги кузатувчиларидан халқаро гастроль ҳали тугамагани сабабли Тошкентдаги концертдан олинган видеоларни тарқатмасликни сўраган, аммо гастроль якунланганидан сўнг тўлиқ видеони эълон қилишга ваъда берган.

Шунга қарамай, Поперечныйнинг концертига тушганини айтган ўзбекистонликларнинг ижтимоий тармоқда ёзганларидан саҳнада халқаро сиёсий вазиятга доир ҳазиллар янграши заҳоти "микрофон ўчиб қолгани" англашилади.

"Поперечный сиёсий ҳазилларни айтишни бошлади. Албатта, бизнинг сиёсат эмас, умуман олганда, ўз мамлакати сиёсати ҳақида. Бирдан микрофон ўчиб қолди. Бошида кўпчилик эътибор бермади. Яна сиёсат ҳақида гап кетганда, овоз йўқолиб қолаверди. Унга симсиз микрофон беришди. Лекин у ҳам ўчиб қолди. Беш мартача шундай бўлгандан кейин бошқалар каби ўзим ҳам бўлаётган ҳолатни ақлимга сиғдиролмадим. Ҳозир аниқ эсимда йўқ, лекин у саҳнадан туриб, овоз ускунасини қараб турганларга микрофонни ўчириб қўйишни айтишяпти мазмунида гапирди. Охири у техник сабаблар эмас, балки сўзини тугатишга қўйишмаётгани учун концертни давом эттиролмаслигини айтди", дея концертдаги таассуротлари билан ўртоқлашган тошкентлик йигит Instagram'даги саҳифасида.

Яна бир Instagram фойдаланувчиси концерт вақтида "Ўзбекистон она Россиядан узоққа кета олмаётгани"ни ҳис қилгани ҳақида ёзган.

Кўплаб томошабинлар Ўзбекистон пойтахтида юз берган бу ҳолатдан "испанча уят" туйганини таъкидлаган.

Кузатувчилари билан ёзишмаларда Поперечныйнинг ўзи ҳолатни "радиодаги эфир вақти янграган номақбул сўзларни узиб қўйиш"га ўхшатган.

"Баъзида улар ҳазилнинг бош қисмини эшитиб, асосий қисмга келганда микрофонни ўчириб қўйдилар. Мен "ҳазил қандай тугашини қаердан биласизлар - балки у қайтанга ҳукуматпарастдир", дея ҳайрон бўлдим", дея ёзган у.

Тармоқда тарқалган 2 дақиқалик видеода Поперечный қўлидаги микрофон, ҳақиқатан, бир неча бор ўчиб қолгани кўринади.

Масалан, у Россияда эълон қилинган қисман сафарбарликка оид ҳазилни энди бошлаган пайти микрофон ишламай қолган ва залдаги томошабинлар бундай ҳолат ҳар сафар юз берганда "Позор" (Иснод) дея қичқирган.

Муносабат

Данила Поперечный билан юз берган ҳолат зумда маданий ҳаёт ихлосмандлари, айниқса, Россиянинг Украинадаги урушини фаол ёритиб бораётган сайтлар, каналлар эътиборини тортган.

Бу хабар, асосан, "Украинадаги урушни қоралаган россиялик артист Ўзбекистонда бевосита цензурага учради" мазмунида яшин тезлигида тарқалган.

Таниқли иқтисодчи Юлий Юсупов юз берган ҳолни "буткул уят" дея атаган.

Блогер Никита Макаренко Россия давлат тузумини танқид қилиб келувчи қизиқчи Тошкентда цензурага учрагани айтилаётган бир пайтда, россиялик артистлар томонидан ташкил этилган ва жамоатчилик талаби билан Қозоғистонда бекор қилинган "Жара" халқаро мусиқий фестивалини Ўзбекистонда ўтказишга рухсат берилганини танқид остига олган.

"Керагидан ортиқроқ мустамлака бўлишга уриниш ва "оқ пошшо" кўнглини у истагандан кўра кўпроқ овлаш", дея икки ҳолатни бир-бирига қиёслаган блогер.

"Бунинг ўрнига биз мамлакатнинг Ҳумо қуши остидаги асосий паркида "Жара" фестивалини ўтказишга рухсат берамиз. Фестиваль жамоатчилик босими билан Қозоғистонда тақиққа учраган - сабаби унда фақат Z-чилар ва уруш қўзғатувчилар чиқиш қилади. Суверенитетни тақсимлашганда биз қозоқлардан кўра камроқ олганмизми, нима бало?" киноя қилган Макаренко.

"Мантиқсизликку..."

Би-би-си илгари сурган даъволари ортидан Данила Поперечныйнинг ўзи билан боғланишга ҳаракат қилди, аммо ундан зудликда жавоб олишнинг имкони бўлмади.

ИИВ матбуот котиби Шоҳруҳ Ғиёсов стендап-комик иддаоларини мантиқсизлик, деб атаб, ички ишлар органлари ва Миллий гвардия ходимлари бундай тадбирларнинг ташкилий масалаларига аралашмаслигини таъкидлади.

"Техник носозликлар ва умуман ташкилий масаларга фақатгина тадбир ташкилотчилари жавоб беради. ИИО ва МГ ходимлари жамоат тартибини сақлашга жалб этиладилар. Тадбуби корлик суббекти саолиятига улалани улаланихгга хақақа йўқ", деди Ғиёсов Би-би-си саволига жавобан.

Россиялик қизиқчи билан бўлган ҳолат президент Мирзиёев Ўзбекистон Украинадаги уруш борасида нейтрал мавқеда қолишини шахсан очиқлаганидан бир кун ўтиб юз берган.

13 март куни кутилмаганда Мирзиёев "катта-катта давлатлар" Ўзбекистонни нейтраллик позициясидан воз кечиб, ўз томонига ўтишга "қаттиқ-қаттиқ даъват қилаётгани" ҳақида гапирган ва бундай чақириқларга "бир томонман — миллатим, халқим, буюк Ўзбекистонимнинг манфаати учун ўлишга ҳам тайёрман", деб жавоб бераётганини таъкидлаган эди.

Россия урушини қоралаб келаётган қизиқчи Поперечный Тошкентда цензурага дуч келганини айтган бўлсада, ўтган йилнинг сентябрида президент Путинни қаттиқ қўлловчи бошқа россиялик таниқли артист - балет раққоси Сергей Полунин ҳам Ўзбекистон пойтахтидаги концерт вақтида тақиққа учраганини даъво қилган эди.

Ўшанда Полунин Украинада ҳалок бўлган рус аскарлари хотирасига бағишланган қўшиққа рақс тушгани туфайли "ташкилотчилар цензурасига учрагани" ҳақида гапирганди.

Данила Поперечный ким ўзи?

1994 йилда Воронежда туғилган Поперечный видеоблогер, стендап-комик, актёр, телебошловчи ўлароқ машҳур.

Болалигида бир неча йил Украинада яшаган Поперечный аввал бошида YouTube'да ўзи тайёрлаган ҳазил анимациялари билан танила бошлаган ва 2013 йилдан буён қизиқчилик билан фаол шуғулланиб келади.

2018 йилда Чеченистон раҳбари Рамзан Қодировни пародия қилиши ортидан кенг жамоатчилик эътиборига тушган.

Қизиқчи Путин тузумини танқид қилиб келади ва Россиянинг Украинага босқини бошланган илк кунлардаёқ россиялик артистлар орасида биринчилардан бўлиб урушга қарши эканини очиқ билдирган, кейинчалик, мамлакатни тарк этган.

Поперечный шу йилнинг январида доимий яшаш мақсадида АҚШ кўчиб ўтганини эълон қилган.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.