Ўзбекистон: Суриядан яна ўзбекистонликлар қайтарилди ва ким давлатга 2 триллион сўм зарар етказди? - Янгиликлар, дунё, Мирзиёев, O‘zbekiston, Mirziyoyev, yangiliklar

Ўзбекистон: Суриядан яна ўзбекистонликлар қайтарилди ва ким давлатга 2 триллион сўм зарар етказди? - Шахсан президент Шавкат Мирзиёев назорати остида бўлган учинчи "Меҳр" операцияси доирасида 8 декабрь куни яна бир гуруҳ ўзбекистонликлар Суриядан ўз ватанига олиб келинди.

Бу ҳақида биринчилардан хабар берган UzReport Суриянинг жанговар ҳаракатлар давом этаётган ҳудудларидан 98 нафар ўзбекистонлик (25 нафар аёл ва 73 нафар болалар) қайтарилгани ҳақида ёзган.

Хабарда бу инсонлар соғломлаштириш муассасаларига жойлаштирилиб, иссиқ овқат ва кийим-кечак билан таъминлангани, уларнинг шахсини тасдиқловчи ҳужжатларини расмийлаштириш бўйича тегишли ишлар амалга оширилиши маълум қилинган.

Ўзбекистон бундан аввал ҳам "Меҳр" инсонпарварлик операцияси доирасида икки бор Яқин Шарқдаги уруш ўчоқларидан 200 дан зиёд фуқароларини ортга қайтариб олиб келган эди.

Президент афви

Президент Шавкат Мирзиёев мамлакат Конституцияси қабул қилинганининг 28 йиллиги муносабати билан озодликдан маҳрум этилган фуқароларни афв этиш тўғрисидаги фармонга имзо чеккан.

Фармон билан озодликдан маҳрум этиш жазосини ўтаётган, "қилмишига чин кўнгилдан пушаймон бўлиб, тузалиш йўлига қатъий ўтган" 104 нафар маҳкум афв этилган.

"Афв этилган шахсларнинг 6 нафари асосий жазодан тўлиқ озод этилди, 50 нафари жазони ўташдан муддатидан илгари шартли озод қилинди, 17 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 41 нафар шахсга тайинланган озодликдан маҳрум этиш жазосининг муддатлари қисқартирилди", дейилади ЎзА нашрида эълон қилинган расмий хабарда.

Президент табриги

Бир вақтнинг ўзида президент Шавкат Мирзиёев Конституция куни муносабати билан Ўзбекистон халқига байрам табригини йўллаган.

Ўз табригида давлат раҳбари ўтган қисқа вақт давомида одамларнинг дунёқараши ўзгаргани, "Янги Ўзбекистон" ибораси халқаро майдонда реал ижтимоий ҳодиса ўлароқ қабул қилинаётгани, "халқ давлат ҳокимиятининг бирдан-бир манбаидир" деган конституциявий норма асосида мамлакатда халқ давлат органларига эмас, давлат органлари халққа хизмат қиладиган тизим шаклланаётганини таъкидлай туриб, марҳум Ислом Каримов давридан буён бўлган сезиларли ўзгаришларни санаб ўтган.

Президентнинг сўзларига кўра, узоқ вақт фуқароликка эга бўлмай келган инсонлар "бугунги кунда ўзларини тўлақонли Ўзбекистон фуқаролари" деб ҳис этмоқда.

"Ўтган йигирма беш йилда 482 нафар шахсга фуқаролик берилган бўлса, бугунги кунда 50 мингдан зиёд киши шу ҳуқуққа эга бўлмоқда", дейилади президент табригида.

Шунингдек, президент чорак аср давомида мустақил Ўзбекистон фуқароларини икки тоифага ажратиб келган прописка тизимини ҳам тилга олган.

"Тошкент шаҳри ва Тошкент вилоятида кўчмас мулк сотиб олиш билан боғлиқ чекловлар бекор қилингани туфайли 40 мингдан ортиқ фуқаро пойтахт минтақасида сотиб олган уй-жойларини ўз номига расмийлаштириш имконига эга бўлди", билдирган президент.

Ушбу табригида ҳам президент Мирзиёев сўз ва матбуот эркинлиги мавзусига яна бир бор тўхталиб ўтган.

У сўз ва матбуот эркинлиги, оммавий ахборот воситалари мустақиллигини таъминлаш, давлат ҳокимияти идоралари фаолияти устидан жамоатчилик назоратини ўрнатишга қаратилган ишлар таъсирчанлиги янада оширилишини таъкидлаган.

"Бир ҳақиқат ҳаммамизга аён бўлиши керак: барча соҳаларда амалга ошираётган ислоҳотларимиз қатори жамиятимизда очиқлик ва ошкоралик, ўзини ўзи танқид ва демократик янгиланиш жараёнлари энди ҳеч қачон ортга қайтмайди ва биз бу йўлни қатъий давом эттирамиз", деган давлат раҳбари.

Бундан ташқари, коррупцияни тараққиёт кушандаси, дея атаган президент сўнгги икки йилда ноқонуний хатти-ҳаракати билан давлатга 2 триллион сўм зарар етказган 1,986 нафар мансабдор шахс коррупцияга оид жиноятлари учун жиноий жавобгарликка тортилганини маълум қилган.

Россия тақиқи

Россия ветеринария ва фитосанитария назорати бўйича федерал хизмати (Россельхознадзор) Фарғона вилоятидан барча ўсимлик маҳсулотларининг олиб кирилишига тақиқ қўйилгани ҳақида хабар берган.

Россельхознадзор ушбу қарорни Фарғона вилоятидан импорт қилинган қуритилган ўрик партиясидан (1 тонна) капр қўнғизи личинкаси аниқлангани билан изоҳлаган.

Назорат органи личинка кўринишидаги зараркунанда ҳар бир килограмм маҳсулот орасидан икки донадан топилгани ва бу маҳсулотнинг жиддий зарарланганидан далолат беришини таъкидлаган.

"Капр қўнғизининг мамлакат ҳудудида тарқалиши ўсимликлар, жумладан, ғалла ҳосилига жиддий зарар етказиши мумкин. Бу эса Россиянинг экспорт салоҳиятига сезиларли таъсир ўтказади. Шу муносабат билан "Россельхознадзор" барча карантиности маҳсулотларни Ўзбекистоннинг Фарғона вилоятидан олиб киришни тақиқлашга мажбур бўлмоқда", дейилади назорат органи хабарида.

Beeline ва 20 миллиард сўм

Beeline Uzbekistan мобил оператори ўз абонентларига 20 миллиард сўмдан зиёдроқ зарар етказиб, ушбу маблағлар компания томонидан мижозлар ҳисобига қайтарила бошланган.

Бу ҳақида Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги хабар бермоқда.

Агентликка кўра, Beeline Uzbekistan "Истеъмолчиларнинг ҳуқуқларини ҳимоя қилиш тўғрисида"ги қонун ва "Мобил алоқа хизматларини кўрсатиш қоидалари" талаблари бузилиши белгилари бўйича қўзғатилган суд ишларида ютқазиши ортидан бу ишга қўл урган.

Агентликнинг маълум қилишича, 2019 йилнинг июль ойида Beeline савдо белгиси остида хизмат кўрсатувчи "Unitel" МЧЖ томонидан абонентларни "Хабардор бўл" хизматига бепул промо-даврга (10 ва 30 кунга) уланиши бўйича промо-акция ўтказилиши тўғрисида эълон берилган, аммо бепул давр тугаши билан, ушбу хизмат промо-акция шартларига кўра автоматик равишда ўчирилмаган, балки ўрнатилган нарх бўйича кунлик 240 сўм миқдорида абонентларга ҳисобланган.

Натижада промо-акцияга умумий ҳисобда 3,2 миллиондан ортиқ абонент уланган бўлиб, улардан 1,2 миллионга яқини томонидан мазкур хизмат мустақил равишда ўчирилган.

2020 йил май ҳолатига ушбу хизмат деярли 1,3 миллион абонентда ёқилган ҳолатда бўлишда давом этган.

Агентлик "Хабардор бўл" хизматига бепул уланган ва акция тугаганидан сўнг автоматик равишда хизмат ўчирилмаган абонентлардан ортиқча маблағ ечиб олинганини таъкидлаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek