Нурсултон Назарбоев 1989 йилдан буён Қозоғистонни бошқариб келади

Нурсултон Назарбоев ўзининг чекланмаган муддатда Қозоғистон президенти бўлиб қолишига имкон берадиган конституциявий ўзгартиришларни тасдиқлади.

Мамлакат парламенти жума куни Нурсултон Назарбоевга унга истагани қадар президентлик лавозимини эгаллаб туришга изн берадиган ўзгартиришлар учун овоз берган эди.

Қозоғистоннинг жорий конституциясига биноан, бир инсон икки муддат президент бўлиши мумкин.

Мамлакат парламенти икки палатасининг ялпи мажлисида 100 парламент аъзосидан атиги бир киши қарши овоз берган.

66 ёшли Нурсултон Назарбоев 1989 йилдан буён Қозоғистонни бошқариб келади.

Унинг ҳозирги президентлик ваколатлари 2012 йилда тугаши керак.

"Янги, мустақил Қозоғистоннинг асосчиларидан бўлган биринчи президентнинг тарихий ролини инобатга олиб, шунингдек, бошланган сиёсий ва иқтисодий ислоҳотларни якунига етказиш эҳтиёжидан келиб чиқиб, парламентнинг қўшма комиссияси шундай қарор қабул қилди", деб айтган Қозоғистон парламенти депутати Ермет Жумабоев.

Айни қарор сиёсий ворислик жиддий масала ҳисобланган минтақа учун нохуш ўрнак бўлиши мумкин

Яна бир депутат Владимир Нехорошевнинг айтишича, парламент ушбу қарорни бевосита Нурсултон Назарбоев учун эмас, одамлар учун қабул қилган.

Мухолифат ушбу қарор Қозоғистоннинг демократиядан жиддий чекиниши, дея баҳолаган.

Айни қарор кўпчилик назарида сиёсий ворислик жиддий масала ҳисобланган минтақа учун нохуш ўрнак бўлиши мумкин.

Улар минтақа раҳбарлари Назарбоев изидан боришга ҳаракат қилишлари мумкинлигидан ташвиш изҳор этишмоқда.

Мамлакат конституциясига ўзгартиришлар киритиш ташаббусини Президент Назарбоевнинг ўзи илгари сурди.

Парламентда маъруза қилган Қозоғистон раҳбари президентлик ваколатларини етти йилдан беш йилга тушириш, мамлакатда президентлик тизими эмас, президент-парламент бошқарувини жорий этишни таклиф этди.

"Собиқ Совет республикалари ичида энг демократик давлат"

	Қозоғистонда турмуш даражаси Марказий Осиёнинг бошқа мамлакатларига қараганда анча юқори

Бугунги кунда мамлакат иқтисодиёти жадал суръатларда ривожланаяпти ва турмуш даражаси Марказий Осиёнинг бошқа мамлакатларига қараганда анча юқори.

Бироқ бу мамлакатда ўтказилган бирорта ҳам сайлов халқаро талабларга мос, деб топилмаган.

Қозоғистон матбуоти давлат томонидан қаттиқ назорат қилинади ва охирги бир ярим йил давомида мамлакатдаги икки етакчи мухолиф сиёсатчи ўлдириб кетилди.

Оиласи аъзолари мамлакатдаги кўплаб бизнес соҳаларини ўз назоратига олганликда айбланадиган Президент Назарбоев, сиёсий ислоҳотлар секин кечадиган жараён, дейди.

Аммо у, Қозоғистон ҳақиқий демократик йўлдан бормоқда, деб доимо таъкидлаб келади.

Яқинда Би-би-си билан суҳбатида жаноб Назарбоев келгуси ўн беш йил ичида Қозоғистон собиқ Совет республикалари ичида энг демократик давлатга айланажагини айтди.

Аммо ушбу конституциявий ўзгаришлар билан, деб ёзади Би-би-си мухбири, Қозоғистонда ўн беш йилдан кейин ҳам айни президент қоладиганга ўхшайди.