Дунё, янгиликлар: Таслим бўлмаган Атамбоев ва Чернобил водкаси

Атамбоев ҳамон озодликда

Чоршанба куни кечга томон Қирғизистон махсус кучлари собиқ президент Алмазбек Атамбоевнинг пойтахт Бишкек ташқарисидаги қароргоҳини босиб олишга уринган эди.

Бироқ жаноб Атамбоевнинг тарафдорлари жиддий қаршилик кўрсатган ва собиқ президентни қўлга олиш амалиёти тўхтатилган.

Икки ўртадаги тўқнашув оқибатида яраланганлар сони 50 нафардан ошган. Бир махсус хизмат ходими олган жароҳатлари ортидан ҳалок бўлгани хабар қилинмоқда.

Шошилинч: Қирғизистон собиқ президенти Атамбоев уйи қандай штурм қилинмоқда

Ўзбекистон: Инсон ҳуқуқларининг икки хил юзи ёхуд Акмал Саидов қандай тобланди?

Ўзбекистон: Мирзиёев ислоҳотлари амалга ошмаслиги мумкин. Нега?

8 август тонгида қароргоҳга йиғилган Атамбоев тарафдорлари 300 дан ошгани айтилади. Мамлакатнинг жорий президенти Сооранбой Жээнбеков жаноб Атамбоевни қонуний текширувга нисбатан қуролли қаршилик кўрсатиш орқали конституцияни бузганликда айблаб чиққан.

Алмазбек Атамбоев эса ўз тарафдорлари қўлида қурол борлигини қатъиян рад этмоқда.

Собиқ ва ҳозирги президентлар ўртасидаги коррупция айблови баҳонасида бошланган зиддият 2018 йилдан буён давом этиб келади. Сооронбай Жээнбеков шу йилнинг май ойида Атамбоевни собиқ президент дахлсизлиги мақомидан маҳрум қилган эди.

Донбассда аҳвол чатоқ: Зеленский Путин билан гаплашди

Сешанба куни Украина шарқида тўрт нафар украиналик ҳарбий ҳалок бўлди. Шундан сўнг президент Владимир Зеленский ўз хизмат фаолиятига киришганидан буён иккинчи бор Владимир Путинга қўнғироқ қилган.

Хабар берилишича, президент Зеленский жаноб Путиндан мамлакат шарқидаги россияпараст бўлгинчиларга таъсир ўтказиб, уларни «украин фуқароларини ўлдиришдан тийдириш»ни сўраган.

Ўз навбатида, президент Путин ҳамкасбига 21 июлдан ҳудудда ўрнатилган оташкесимга сўзсиз амал қилиш заруриятини яна бир бор эслатиб ўтган.

Президентлар ўртасидаги илк телефон сўзлашуви июль ойининг бошида Украина ташаббуси билан бўлиб ўтган эди.

Кобулда йирик портлаш содир бўлди

Афғонистон пойтахти Кобул шаҳридаги полиция маҳкамаси ташқарисида кучли портлаш кузатилди. Оқибатда, 14 инсон ҳаётдан кўз юмди, 150 га яқин одам жароҳат олди.

Юк машинасига ўрнатилган бомба портлаши бўйича масъулиятни Толибон ўз зиммасига олган.

Ушбу хунрезлик Толибон ва АҚШ ўртасида 18 йилга яқин вақтдан бери давом этаётган урушга чек қўйиш юзасидан тинчлик музокаралари кетаётган бир пайтда содир бўлмоқда.

Толибон ва АҚШ тарихий тинчлик сулҳи имзолашга яқин турган бўлсада, ўтган вақт ичида мамлакат бўйлаб бир неча ҳужумлар кузатилган.

Июнь ойининг ўзида 1,500 нафарга яқин афғонистонлик террор ҳужумлари қурбонига айланган ёки жароҳат олган. Шунингдек, Толибон 28 сентябрда ўтувчи президентлик сайловларини бойкот қилиб, сайловолди кампанияларини нишонга олиш билан таҳдид қилган.

Чернобилда илк истеъмол маҳсулоти ишлаб чиқарилди

30 йилдан зиёд вақт давомида кимсасиз ҳудудга айланиб қолган Чернобилнинг тақиқланган ҳудудида истеъмол қилишга яроқли илк маҳсулот ишлаб чиқарилди ва бу - ароқ.

Янги ташкил қилинган The Chernobyl Spirit Company компанияси жамоаси радиацияга тўлиб-тошган тақиқланган ҳудудда етиштирилган арпа ва ташландиқ реакторга яқин ердан олинган сувдан ароқ тайёрламоқда.

Ишлаб чиқарувчилар Atomik номи берилган ароқнинг истеъмол учун мутлақо хавфсиз экани, унда ҳеч қандай нурланиш даражаси йўқлигини таъкидлайди.

Компания ароқ сотувидан тушган маблағ билан ҳудуддаги маҳаллий аҳоли ҳаётини яхшилашни кўзлаётганини билдиради.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek