Ўлдирилган икки аёлнинг жасади чўчқаларга едирилганми?
Сурат манбаси, Nomsa Maseko / BBC
Жанубий Африканинг давлат прокурори икки қора танли аёлни ўлдириб, жасадларини чўчқаларга едирганликда айбланаётган уч айбланувчидан бирига қўйилган айбловларни расман олиб ташлаган.
Адвокатларининг айтишларича, Адриан Де Вет қотиллик содир бўлган тунда нималар юз берганини рўй-рост айтиб берган.
Судда танаффус эълон қилинган чоршанба куни маҳкама залидан қўйиб юборилган ва адвокатлари томонидан олиб кетилган.
Қурбонлар яқинларидан бирининг BBC га айтишича эса, қотилликдан гумон қилинаётганлардан бирининг озод этилиши адолат қарор топмаслигини англатади.
Де Вет суд жараёни тугагунига қадар ҳибс остида сақланиши айтилмоқда.
Iqtisodiy erkinlik kurashchilari" ushbu fermer xo‘jaligi mahsulotlari sotilishiga qarab tura olmaydi, chunki ular iste’molchilar uchun xavf tug‘diradi.
Қотиллик ва маҳкама жараёни
Маълум бўлишича, ҳодиса ўтган йили Жанубий Африканинг Полокване шаҳри яқинида жойлашган фермада юз берган.
Фаразларга кўра, 45 яшар Мария Макгато ва 34 ёшда бўлган Люсия Ндлову фермадан овқат излаётган пайтда ўлдирилган.
Адриан де Вет мазкур қотилликда айбланаётган учта эркакдан бири эди.
Тахминларга кўра, аёлларнинг жасадлари далилларни йўқ қилиш ниятида кейин чўчқаларга берилган.
Мазкур иш юзасидан суд жараёни шу ҳафта душанба куни бошланган.
Суд жараёнида айбланувчиларга қарши гувоҳлик беришга рози бўлган 20 яшар Де Вет икки аёлни фермер хўжалиги эгаси Захария Йоханнес Оливье отиб ўлдирганини айтган.
Ўлдирилган пайтларида икковлон чўчқалар учун қолдирилган ва тез орада яроқлилик муддати тугайдиган сут маҳсулотларини излаётган бўлганлар.
Фермада иш бошқарувчи бўлиб ишлаган Де Вет уларнинг жасадларини чўчқалар қўрасига ташлаган пайтда ўзининг босим остида бўлганини айтиб, кўрсатма берган.
Бу воқеа бутун Жанубий Африкада акс-садо берган, норозиликлар билан қарши олинган, ирқий заминдаги тангликни кучайтирган.
Акс-садолар
Апартеиднинг ирқчи тузуми ўнлаб йиллар аввал тугатилганига қарамай, бу каби кайфият мамлакатнинг қишлоқ ҳудудларида ҳозир ҳам анчайин чуқур сезилади.
Аксарият хусусий қишлоқ хўжалиги эрлари оқ танли озчиликнинг қўлида қолмоқда, фермер хўжаликларининг аксарият ишчилари қора танлилар ва уларга кам ҳақ тўланади, қора танли аҳоли орасида бундан норозилик кучли, кўплаб оқ танли фермерлар эса жиноятчилик даражаси юқорилигидан шикоятда.
Учинчи айбланувчи ҳам фермер хўжалигининг ишчиси бўлган 50 ёшли Уильям Мусорадир.
У ва фермер хўжалиги эгаси Захария Йоханнес Оливье ҳали айбларини тан олишмаган ҳамда панжара ортида.
Учовлон яна фермада аёллар билан бирга бўлган Ндлову хонимнинг турмуш ўртоғини отиб ўлдиришга қасд қилиш, шунингдек, лицензиясиз ўқотар қуролга эгалик қилиш ва далилларни яшириш мақсадида жасадларни чўчқалар қўрасига ташлаб, адолатнинг қарор топишига тўсқинлик қилганликда айбланишмоқда.
Зимбабве фуқароси Уильм Мусора мамлакатда ноқонуний мақомда бўлгани учун Жанубий Африканинг Иммиграция қонунига биноан қўшимча айбловга ҳам юз тутади.
Суд жараёни олдидан Лимпопо Олий суди қурбонларнинг тарафдорлари ва қариндошларига тўлиб кетган.
Суд залида бундан аввал фермани ёпишни талаб қилган "Иқтисодий эркинлик курашчилари" мухолифат партияси аъзолари ҳам кўриниш берганлар.
Партия жасадлар топилганидан кейин ""Иқтисодий эркинлик курашчилари" ушбу фермер хўжалиги маҳсулотлари сотилишига қараб тура олмаслиги, чунки улар истеъмолчилар учун хавф туғдириши"ни айтган.
Суд жараёни давом этмоқда.
