Ҳусанов Ўзбекистонининг жаҳон чемпионатига чиқишига яқин қолдими – "Манчестер Сити" миллий терма жамоанинг Тошкентдаги ўйинини беэътибор қолдирмади
Сурат манбаси, Getty Images
"Манчестер Сити" Ўзбекистоннинг гуруҳдан чиқишига яқин қолганини сарлавҳасига олиб чиқди. Тошкентда мезбонлар ўйин бошидан охиригача устунлик қилишди, деб ёзди.
Тошкентдаги ўйин
Сурат манбаси, Getty Images
Бу Англиянинг энг топ клубларидан бири бўлган "Манчестер Сити"га ўтишидан кейин Абдуқодир Ҳусановнинг илк бор Ўзбекистон миллий терма жамоаси сафида майдонга тушиши бўлди.
Ўзбекистон 2026 йилги жаҳон чемпионати Осиё қитъаси 3-босқич саралаш беллашувларининг еттинчи тури доирасида кеча, 20 март куни Қирғизистонга қарши майдонга тушди, ўйинни ўзининг фойдасига ҳал қилди.
Миллий терма жамоа рақибларини Тошкентнинг "Бунёдкор" стадионида 1:0 ҳисобида мағлуб этди, муҳим уч очкони қўлга киритди.
"А" гуруҳида Эрондан кейин ўзининг иккинчи ўрнини янада мустаҳкамлаб олди.
Энг яқин рақиби Бирлашган Араб Амирликлари билан ўртасидаги фарқни эса, 6 очкога етказди.
Ўзининг тарихида илк бор жаҳон чемпионатига чиқиш имкониятини янада яхшилади.
Кечаги ўйинини Эронга ютқазиб қўйган Бирлашган Араб Амирликларининг Ўзбекистоннинг ўрнига кўз тикиши учун гуруҳдаги қолган уч учрашувини ғалаба билан якунлаши шарт бўлиб қолди.
Кичик ҳисобда бўлса-да, Ўзбекистоннинг драматик кечган ва натижаси ўзи учун муҳим бўлган ўйиндаги ғалабаси мамлакатнинг ўзида ҳам "2026 йилги жаҳон чемпионатига яна бир қадам яқинлашдик", деган талқиндаги баҳоларга сабаб бўлди.
Ўзбекистон Футбол Уюшмаси ҳам "манзилга яқин қолгани"ни ўз суратига тагсўз ўлароқ ёзди.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Жаҳон чемпионати
Сурат манбаси, Getty Images
Ўзбекистон миллий терма жамоаси Осиё Ўйинлари ғолиблигини қўлга киритган, Осиё Кубогининг ярим финалига чиқиб, қитъанинг энг кучли тўртта жамоасидан биттасига айланган эса-да, ҳалича жаҳон чемпионатида тўп сура олмаган.
Ўзбекистон миллий терма жамоасининг қачон жаҳон чемпионатига чиқиши, йилларки, маҳаллий футбол ишқибозларининг тилида юрган саволлардан бири бўлади.
Терма жамоанинг 2018 йилги жаҳон чемпионати Осиё қитъаси якуний босқич саралаш беллашувларида қайд этган устма-уст мағлубияти уларнинг ҳатто мамлакатнинг ўша пайтдаги ташқи ишлар вазирига мурожаат билан чиқишларига ҳам сабаб бўлгани хабар берилган.
Абдулазиз Комиловнинг халқ билан илк очиқ мулоқотига оид хабар манзарасида айни шу мазмундаги саволнинг вазирлик матбуот хизматига келиб тушгани ўшанда алоҳида янгилик бўлган.
Би-би-си Ўзбек хизматининг орада президент Шавкат Мирзиёевнинг шахсан ўзи билан очиқ мулоқот қилиш имкони бўлганида, сиз у кишидан нималарни сўраган бўлардингиз, деган сўровига жавоб берганларнинг орасида ҳам, "Ўзбекистоннинг қачон жаҳон чемпионатига чиқишини сўраган бўлардим", деганларининг борликлари кўрилган.
Gazeta.uz мухбирларининг хабар беришича, Ўзбекистоннинг Қирғизистонга қарши ўйинини кеча, пайшанба куни мамлакат Бош вазири Абдулла Ариповнинг шахсан ўзи стадион трибуналаридан туриб кузатган.
Абдуқодир Ҳусанов ва "Манчестер Сити"
Lekin hali oldinda o‘yinlar bor. Tehronda o‘yin oson bo‘lmaydi, ammo kerakli natijani qo‘lga kiritishga intilamiz.
"Манчестер Сити" ўзининг хабарида Ўзбекистоннинг Қирғизистонга қарши ўйинида Абдуқодир Ҳусановнинг майдонда тўлиқ 90 дақиқа ўйнаганини алоҳида таъкидлаган.
Бу Ҳусановнинг ўз мамлакати шарафини 19-бор ҳимоя қилиши бўлгани, мезбонлар ўйин бошидан охиригача устунлик қилишгани ҳақида ёзаркан, "Манчестер Сити" Ўзбекистон миллий терма жамоаси берган зарбалар сонию улардан қанчасининг нишонга текканлиги тафсилотларигача бирма-бир тўхталган.
Тошкентдаги кечаги ўйин ва ўзбекистонлик ўйинчисининг ундаги иштирокига оид хабарини эса, "Манчестер Сити" Эроннинг Бирлашган Араб Амирликларини мағлуб этиши манзарасида Ўзбекистоннинг ғалабаси уни тарихий квалификацияга яқинлаштиргани ҳақидаги хулоса билан тугатган.
Абдуқодир Ҳусановнинг ўзи Тошкентда Қирғизистонга қарши ўйин олдидан журналистларга берган суҳбатида, "тайёргарликлари яхши экани, учрашувга тайёр эканликлари, иншааллоҳ, ютишлари"ни айтиб, уларнинг саволларига жавоб берганди.
Йўлланмалар тақдири
Сурат манбаси, rasmiy
Ўзбекистон миллий терма жамоаси ўзининг қолган уч учрашувини Эрон ва Бирлашган Араб Амирликлари билан сафарда, Қатарга қарши эса, ўз майдонида, пойтахт Тошкентда ўтказади.
Гуруҳ етакчиси Эронга қарши ўйини 25 март куни бўлиб ўтади.
Шу уч ўйиндан бирида ютса, қолган иккитасида эса, камида дуранг ўйнаса, Ўзбекистоннинг жаҳон чемпионатига тўғридан-тўғри йўлланма олиши учун имконияти юқори бўлади.
Ўзбекистон қолган ўйинларида дуранг натижа қайд этиб, Бирлашган Араб Амирликлари ҳар уч учрашувини ҳам ғалаба билан якунлаган тақдирда эса, гуруҳдан иккинчи даъвогарнинг тақдирини тўплар ҳисобидаги фарқ ҳал қилади.
Бирлашган Араб Амирликлари қолган учрашувларини Шимолий Корея, Ўзбекистон ва Қирғизистонга қарши ўтказади.
Бундан ташқари, Қатар ҳам "А" гуруҳида етти ўйиндан жами 10 очко тўплаб, БАА билан учинчи ва тўртинчи ўринларни фақат тўплар ҳисобидаги фарқ билан бўлишиб турган яна бир жамоа бўлади.
Бу босқичда ўз гуруҳида юқори икки ўринни эгаллаган икки жамоа тўғридан-тўғри жаҳон чемпионатига йўлланмани қўлга киритади.
Кеча, 20 март куни бўлиб ўтган саралаш беллашувлари манзарасида Япония 2026 йилги жаҳон чемпионатига чиққан мезбон бўлмаган биринчи давлатга айланган, жамоа бу вазифани муддатидан илгари ҳал қилган.
Қирғизистон билан ўйиндан кейин ташкил қилинган матбуот анжуманида Ўзбекистон миллий терма жамоаси бош мураббийси Тимур Кападзе ҳам ўзларининг жаҳон чемпионатига "жуда яқин қолганликлари"ни таъкидлаган.
"Лекин ҳали олдинда ўйинлар бор. Теҳронда ўйин осон бўлмайди, аммо керакли натижани қўлга киритишга интиламиз", - деб айтган.
Ўзбекистондаги футболга ихтисослашган нашрлар эса, Ўзбекистон Қирғизистонга қарши ўйиндаги ғалабаси ортидан, ФИФА рейтингидаги мавқеъини бир поғона яхшилаб, 57-ўринга чиқиб олгани ҳақида ёзишга ҳам улгуришган.
