Ўзбекистон ва дунё: Трамп БРИКСдагиларга қўшимча 10% лик бож билан таҳдид қилди

Президент Доналд Трамп АҚШ манфаатларига зид БРИКС ташкилоти сиёсатини қўллаб-қувватлайдиган мамлакатларга қўшимча 10 фоизлик тариф қўллаши мумкинлиги ҳақида огоҳлантирди.

"БРИКСнинг аксиламерика сиёсатига қўшиладиган ҳар қандай мамлакатга ҚЎШИМЧА 10%лик бож қўйилади. Бу сиёсатда истисно бўлмайди", деб ёзди Трамп ўзининг Truth ижтимоий тармоғида.

Президент Трампнинг норозилигига 6 июл куни эълон қилинган БРИКСга аъзо мамлакатлар раҳбарларининг декларацияси сабаб бўлди.

Рио-де-Жанейродаги саммитга Хитой раҳбари Си Цзинпин, Россия Президенти Владимир Путин, Эрон Президенти Маъсуд Пезешкиён бормадилар.

БРИКС декларациясида "савдони бузадиган ва Жаҳон Савдо ташкилотининг қоидаларига тўғри келмайдиган бир тарафлама тарифли ва тарифсиз чоралар кўпайганидан жиддий хавотир" изҳор этилади.

Бундай чоралар "жаҳон савдосининг янада қисқаришига ва глобал таъминот занжирининг узилишига олиб келади" ва "жорий иқтисодий номутаносибликни янада чуқурлаштириши ва глобал иқтисодий тараққиёи истиқболига таъсир қилиши мумкин"лиги айтилади баёнотда.

Шунингдек, БРИКС Халқаро Валюта жамғармасини ислоҳ қилишга, дунё валюталарини баҳолашга ёндашувни ўзгартиришга чақирган.

Ҳужжатда Трамп номи тилга олинмаган, бироқ кузатувчилар БРИКС баёнотини Трампга қарши сиёсий зарба деб қабул қилдилар.

БРИКС — Бразилия, Россия, Ҳиндистон, Хитой ва Жанубий Африка республикаси 2010 йили ташкил қилган бирлашма номи.

Ўтган йили ташкилотга Эрон, Миср, Бирлашган Араб амирликлари, Эфиопия қўшилган, Туркия ва Озарбайжон қўшилиш учун ариза топширган.

Ўзбекистон ва Қозоғистон

6 июлдаги Бразилиядаги саммитда Индонезия ташкилотга аъзо бўлиб кирди, Беларус, Ўзбекистон ва Қозоғистон ва бошқаларга БРИКСнинг шерик мамлакатлари деган мақом берилгани эълон қилинди.

Трамп БРИКСни узоқ вақтдан буён танқид қилиб келади.

Шу йил февралида "агар доллар билан ўйнашадиган бўлсалар", БРИКС мамлакатларига 100 фоизлик бож жорий қилиш билан пўписа қилган эди.

Трамп бунда Россияни тилга олмаган.

Бироқ айнан Москва Ғарб санкциялари киритилганидан кейин аъзо мамлакатлар ўртасидаги олди-сотдида АҚШ долларидан воз кечиш ғоясини илгари суриб келади.

Кремл матбуот котиби Дмитрий Песков Трампнинг қўшимча тарифлар ҳақидаги баёнотига муносабат билдириш сўралганида шундай деди:

"БРИКС доирасидаги ўзаро ҳамкорлик ҳеч қачон қандайдир учинчи мамлакатларга қарши қаратилмаган ва қаратилмайди ҳам".