واجبات کی ادائیگی،’سعودی حکام نے مدد کا وعدہ کیا ہے‘
،تصویر کا ذریعہAFP
سعودی عرب نے نوکریوں سے فارغ ہونے کے بعد واجبات کے منتظر پاکستانی اور انڈین شہریوں سمیت ہزاروں ایشیائی باشندوں کی مدد کا وعدہ کیا ہے۔
پاکستان، انڈیا اور فلپائن سے تعلق رکھنے والے ہزاروں کی تعداد افراد سفارتخانوں اور امدادی تنظیموں کی جانب سے دی جانے والی امداد پر گزارا کر رہے ہیں۔
سعودی ذرائع ابلاغ کا کہنا ہے کہ حکام نے یہاں پھنسے ہوئے مزدوروں کی مدد کے لیے ہنگامی طور پر رہائش اور ملک چھوڑنے پر پابندیوں میں نرمی لانے کا وعدہ کیا ہے۔
سعودی عرب میں پاکستانی سفیر منظور الحق نے پاکستان کے سرکاری ٹی وی سے بات کرتے ہوئے بتایا کہ ایک کمپنی میں کام کرنے والے تقریباً 7500 پاکستانی متاثر ہوئے ہیں جبکہ ایک اور کمپنی میں تقریباً 500 پاکستانی ہیں جنھیں کئی مہینوں سے تنخواہیں نہیں ملی ہیں۔
ان کا کہنا تھا کہ ان پاکستانیوں کو مختلف شہروں میں کیمپس میں رکھا گیا ہے اور پاکستانی حکام ان محنت کشوں اور سعودی حکام کے ساتھ بھی رابطے میں ہیں۔
’اس معاملے میں یہاں کی حکومت بھی کوشش کر رہی ہے اور ان کمپنیوں کو ہدایات دی گئی ہیں کہ وہ ان مزدوروں کے واجبات ادا کریں اور ان کی مشکلات حل کریں۔‘
End of سب سے زیادہ پڑھی جانے والی
منظور الحق کا کہنا تھا کہ کیمپوں میں مقیم پاکستانیوں کو کھانے پینے کی اشیا بروقت پہنچائی جا رہی ہیں۔
،تصویر کا ذریعہReuters
حکام کے مطابق سعودی عرب میں مقیم پاکستانیوں کو درپیش ایسے مسائل کے حل کے لیے پاکستانی سفارت خانے میں ایک سیل قائم کردیا گیا ہے جہاں پر کوئی بھی پاکستانی اپنے مسائل کے بارے میں درخواست دے سکتا ہے۔
ادھر جدہ میں انڈین قونصل جنرل نور رحمان شیخ کا کہنا ہے کہ سعودی حکومت وطن واپسی میں مدد کی پیشکش کر رہی ہے۔
انڈیا نے اس معاملے کو سلجھانے کے لیے جونیئر وزیر خارجہ وجے کمار سنگھ کو سعودی عرب بھیجا ہے تاکہ انڈین شہریوں کی وطن واپسی کا بندوبست کیا جا سکے۔
حکام کے مطابق تقریباً 7،700 انڈین مزدور اس وقت سعودی عرب میں نوکریوں سے فارغ ہونے کے بعد پھنسے ہوئے ہیں۔
