امریکی شہر ہیوسٹن میں شدید بارشوں سے پانچ ہلاک
،تصویر کا ذریعہ
امریکی ریاست ٹیکسس کے شہر ہیوسٹن میں شدید بارشوں کی وجہ سے پانچ افراد ہلاک ہوئے ہیں اور متاثرہ علاقوں میں شدید سیلاب کی صورت حال ہے۔
ہیوسٹن کا شہر بہت زیادہ متاثر ہوا ہے جہاں ریاست کے گورنر گریک ایبٹ نے ہنگامی حالت کا اعلان کیا ہے۔
محکمہ موسمیات کے حکام کے مطابق پیر کے روز ہیوسٹن میں تقریباً 17 انچ بارش ہوئی جو ایک تاریخی واقعہ ہے۔
ڈاؤن ٹاؤن ہیوسٹن کی دریاؤں میں طغیانی کے سبب کئی علاقوں میں پانی کی سطح بڑھ گئی ہے جہاں تقریبا 1،200 لوگوں کو سیلابی ریلے سے باہر نکالا گیا ہے۔
،تصویر کا ذریعہ
ہیوسٹن امریکہ کا چوتھا بڑا شہر ہے جہاں سیلاب کی صورت حال کے سبب تقریباً 70،000 لوگوں کے گھروں میں بجلی منقطح ہوگئی ہے۔
سیلاب کے پانی سے تقریبًا 1،000 گھر متاثر ہوئے ہیں جن میں پانی اندر تک پہنچ گیا ہے اور ابھی پانی کی سطح بڑھ رہی ہے۔
مقامی حکام نے ایک بڑے شوپنگ مال کو بےگھر ہونے والے متاثرہ لوگوں کے لیے محفوظ سینٹر بنا دیا ہے۔
،تصویر کا ذریعہ
اطلاعات کے مطابق ہلاک ہونے والے ایک شخص کی لاش پانی میں ڈوبی ہوئی گاڑی سے برآمد ہوئی ہے۔
End of سب سے زیادہ پڑھی جانے والی
حکام نے شہریوں کو خبردار کیا ہے کہ وہ تیز بہتے پانی میں گاڑی نہ چلائیں اور بچوں کو بھی پانی میں کھیلنے سے منع کیا گیا ہے جس میں سانپ اور دیگر موزی جانور ہوسکتے ہیں۔
سب سے زیادہ متاثر ہونے والے علاقوں میں گرین پوائنٹ کا مقام بھی ہے جہاں زیادہ تر غریب ہسپانوی نژاد لوگ آباد ہیں۔
،تصویر کا ذریعہ
ہیوسٹن شہر خیلج میکسکو کے پاس آباد ہونے کی وجہ سے یہاں تیز بارشوں کا سلسلہ ایک عام بات ہے۔ گذشتہ برس ہی شہر کئی بار شدید سیلاب کی ذد میں آیا تھا۔
دی سٹی آف ہیوسٹن کے ٹوئٹر اکاؤنٹ پر لکھا ہے کہ یہ سیلاب سنہ 2001 میں 'ٹروپکل سٹارم الیزن‘ کے بعد سے آنے والا اب تک کا سب سے بڑا سیلاب ہے۔
2001 کے سیلاب میں 23 لوگ ہلاک ہوئے تھے۔
حکام کا کہنا ہے کہ منگل تک بارشوں کی شدت میں کمی آنے کا امکان ہے۔
.
