شام پر اختلافات دور کرنے کے لیے جان کیری کا روس کا دورہ
،تصویر کا ذریعہAFP
امریکی وزیر خارجہ جان کیری شام میں جاری خانہ جنگی کے سیاسی حل پر روس اور امریکہ کے درمیان پیدا ہونے والے اختلافات کو ختم کرنے کے لیے ماسکو پہنچ گئے ہیں۔جہاں وہ روس کے صدر سے بھی ملاقات کریں گے۔
جان کیری اپنے اس دورے کے دوران روسی صدر ولادی میر پوتن اور اپنے ہم منصب سرگے لاوروف سے ملاقاتیں کریں گے۔
اپنے روسی ہم منصب سے ملاقات سے قبل جان کیری نے اُمید ظاہر کی روس اور امریکہ شام کے بحران کے حل کے لیے مشترکہ موقف پر بات کر سکیں گے۔
جان کیری روسی وزیر خارجہ سے ملاقات کرنے کے بعد روس کے صدر ولادی میر پوتن سے بھی ملاقات کریں گے تاکہ شام کے بحران کے حل کے لیے مذاکرات میں کن ممالک کو شامل کیا جائے اس پر اختلافات کم کیے جا سکیں۔
امریکہ اور روس کے درمیان شام میں جاری خانہ جنگی کو ختم کرنے کے حوالے سے شامی صدر بشار الاسد کے کردار پر اختلاف پایا جاتا ہے۔
امریکہ کی خواہش ہے کہ صدر بشار الاسد اقتدار چھوڑ دیں جبکہ روس کا کہنا ہے کہ اس بات کا فیصلہ صرف شامی عوام کر سکتی ہے۔
بات چیت سے قبل روس کے وزارت خارجہ نے امریکی پالیسی پر سوالات اٹھائے ہیں اور الزام عائد کیا ہے کہ امریکہ نے ’شدت پسندوں کو اچھے اور برے کی درجہ بندی میں تقسیم کیا ہے۔‘
End of سب سے زیادہ پڑھی جانے والی
روس شام میں فضائی حملے کرتا آرہا ہے جن میں اس کے مطابق وہ شدت پسند تنظیم دولت اسلامیہ کو نشانہ بنا رہا ہے جبکہ امریکہ الزام عائد کرتا ہے کہ روس باغیوں کو نشانہ بنا رہا تاکہ اپنے اتحادی صدر بشار الاسد کو مضبوط کر سکے۔ روس ان الزامات کی تردید کرتا ہے۔
دوسری جانب امریکی اتحادی دمشق میں حکام کے ساتھ تعاون کیے بغیر گذشتہ سال ستمبر سے شام میں دولت اسلامیہ کے جنگجوؤں کو نشانہ بنا رہے ہیں۔
جان کیری رواں ہفتے شام پر ہونے والے بین الاقوامی مذاکرات کے لیے راہ ہموار کرنے کی کوشش کریں گے۔جبکہ شامی حکومت اور حزب اختلاف کے درمیان مذاکارت بھی آئندہ سال جنوری میں ہونے کے امکانات ہیں۔
امکان ظاہر کیا جا رہا ہے کہ جان کیری ماسکو کے دورے کے دوران مشرقی یوکرین میں استحکام کے لیے مسلسل کوششیں کرنے کے حوالے سے بھی بات کریں گے۔
