پوپ کی نئی عینک

روم کے شہریوں اور وہاں آنے والے سیاحوں کو جمعرات کو پوپ فرانسس کا ایک الگ ہی انداز دیکھنے کو ملا۔

رومن کیتھولک چرچ کے سربراہ پوپ فرانسس ایک عینک ساز کی دکان پر پہنچے اور انھوں نے اپنی عینک کے پرانے فریم میں نئے شیشے لگوائے۔

انھوں نے نئے شیشے کو پرانے فریم میں فٹ کرنے پر زور دیا اور بل اد کرنے پر بھی اڑ گئے۔

ان کے ہمراہ ان کا سکیورٹی عملہ بھی موجود تھا۔ پوپ فرانسس کو دیکھنے کے لیے لوگ وہاں اکٹھے ہو گئے اور انھیں گھیر لیا۔

دکان کے مالک اس سے پہلے بھی پوپ فرانسس کے لیے عینک کے شیشے بنا چکے ہیں لیکن وہ شیشے ویٹیکن پہنچاتے رہے ہیں۔

ان کا کہنا تھا کہ انھیں پوپ کے آنے کے بارے میں پہلے سے کوئی خبر نہیں تھی۔

پوپ فرانسساس سے پہلے کہہ چکے ہیں کہ انھیں اس بات کا ملال ہوتا ہے کہ وہ اکیلے باہر جا کر پیزا نہیں کھا سکتے۔

پوپ کا عہدے سنبھالنے سے قبل وہ بیونس آئرس میں اکثر عوامی مقامات پر دکھائی دیتے تھے۔

رواں ماہ نیشنل جیوگرافک میگزین میں ان کے بارے میں بتایا گیا ہے کہ ان کا دل روم کی گلیوں میں بھی اسی طرح چہل قدمی کرنے کا دل کرتا ہے جیسے وہ بیونس آئرس میں کیا کرتے تھے۔