مصر میں طوطن خامن گیلری کا افتتاح

قاہرہ کے عجائب گھر میں طوطن خامن گیلری کے چار کمرے مرمت کے بعد سیاحوں کے لیے کھول دیے گئے ہیں۔

تزئین و آرائش کا یہ کام عجائب گھر کی تعمیر نو کے ایک سات سالہ منصوبے کا حصہ ہے۔

ان کمروں کا افتتاح مصر کے وزیر اعظم ابراہیم محلب نے کیا اور ان میں 1922 میں دریافت ہونے والی نوجوان فرعون بادشاہ کی قبر سے ملنے والی نایاب اشیاء کو رکھا گیا ہے۔

طوطن خامن کی قبر سے ملنے والی اشیا بیسوئیں صدی کی سب سے زیادہ اہم آثار قدیمہ کی دریافت میں سے ہیں۔

طوطن خامن کی تین ہزار سال پرانی قبر کی کھدائی برطانوی ماہر آثار قدیمہ ہاورڈ کارٹر فلہین نے کی تھی۔

عجائب گھر کی تزئین و آرائش یورپی یونین اور دیگر بین الاقوامی اداروں سے ملنے والی رقم سے کی جا رہی ہے۔

قاہرہ میں یورپی یونین کے وفد کے سربراہ جیمز مورن نے کہا ہے کہ یورپی یونین مصر میں سیاحت کے شعبے کو فروغ دینے کے لیے مدد فراہم کرتی رہے گی۔ ان کا کہنا تھا کہ سیاحت کے شعبے کی بحالی معیشت کی بہتری کے لیے ناگزیر ہے۔

یورپی یونین عجائب گھر کی مزید تزئین و آرائش کے لیے اگلے سال ایک لاکھ ڈالر فراہم کرے گی۔

قاہرہ کے عجائب گھر کا افتتاح 1902 میں ہوا تھا اور اس میں تقریباً ایک لاکھ ساٹھ ہزار قدیم قیمتی نوادرات موجود ہیں۔