بی بی سی کی 100 خواتین: ملالہ یوسفزئی اور عابیہ اکرم سے 50 افغان خواتین تک، 2021 کی فہرست میں کون کون شامل ہے؟

انسانی حقوق کی وکلالت کرنے والی سماجی رہنما کرسٹل بیات کو 2021 میں افغانستان طالبان کے غلبے کے خلاف اُن کے احتجاج کی وجہ سے پہچانا جاتا ہے۔

وہ 19 اگست کو افغانستان کے یومِ آزادی کے موقع پر کابل میں ہونے والے اس احتجاج کے منتظمین میں شامل تھیں جس میں اُن سمیت محض سات خواتین شریک ہوئیں۔ انھوں نے سیاسی انتظام کے شعبے میں اس برس پی ایچ ڈی کا آغاز کیا مگر ملک پر طالبان کے قبضے کی وجہ سے اُن کا یہ تعلیمی سلسلہ ادھورا رہ گیا۔

فی الوقت وہ امریکہ میں مقیم ہیں جہاں سے وہ انسانی حقوق کے لیے افغانستان میں حاصل کردہ کامیابیوں کو محفوظ رکھنے کی جدوجہد جاری رکھے ہوئے ہیں۔ انھیں اُمّید ہے کہ وہ اپنی پی ایچ ڈی مکمل کرکے ایک کتاب لکھ سکیں گی۔

*بالآخر میں مستقبل میں افغانستان میں آنے والی جمہوری تبدیلیوں کا حصّہ بننا چاہوں گی۔ میرا خواب ہے کہ میں اقوام متحدہ سے خطاب کر سکوں۔ کیوں کہ مجھے یقین ہے کہ دنیا کو وہ حقیقت سننے کی ضرورت ہے جو افغانوں ، خصوصاً خواتین کے پاس کہنے کو ہے۔

بنفشہ یعقوبی اور ان کے شریکِ حیات دونوں نابینا ہیں۔ انھوں نے بصارت سے محروم افغان باشندوں کو تعلیم فراہم کرنے اور بحالی میں مدد دینے کے لیے اپنا ادارہ ’راہ یاب آرگنائزیشن‘ قائم کیا۔ انسانی حقوق کے لیے سرگرم بنفشہ یعقوبی ملک کے آزاد انسانی حقوق کمیشن میں بطور کمشنر بھی کام کرتی رہی ہیں اور ان کی توجہ بینائی سے محروم افغان بچوں کی تعلیم پر مرکوز رہی ہے۔

طالبان کی یلغار کے بعد انھیں ملک چھوڑنا پڑا لیکن وہ ان افغان معذور افراد کی وکالت میں آواز بلند کرتی رہیں جن کے بارے میں انھیں خدشہ ہے کہ طالبان اُن سے امتیاز برتیں گے۔

رسائی اور امتیازی سلوک افغانستان کے سنگین مسائل رہے ہیں۔ افغانستان آبادی میں معذور افراد کے تناسب کے لحاظ سے دنیا کا سب سے بڑا ملک بن چکا ہے جس کی ایک وجہ دہائیوں سے وہاں جاری جنگ بھی ہے۔

*اگر اب بھی کوئی اُمّید ہے تو میرے لیے وہ اپنے ملک کو زیادہ آزاد دیکھنے اور تمام افغانوں کی اس کی ترقی میں شمولیت کے حوالے سے ہے۔

فلسفے اور سماجی علوم کی ممتاز دانشور ڈاکٹرعالمہ وزراتِ امن میں انسانی حقوق اور معاشرتی امور کی نائب وزیر تھیں۔ وہ خواتین کے حقوق کی ایک نامور وکیل اور سیاست میں خواتین کے کردار سے متعلق ایک ادارے انڈیپینڈینٹ ویمنز پلیٹیکل پارٹیسیپیشن کمیٹی کی بانی بھی ہیں۔

جرمنی سے فلسفے میں پی ایچ ڈی کرنے والی ڈاکٹرعالمہ تنازعات کے تجربے کے شعبے میں 20 برس سے زیادہ کا تجربہ رکھتی ہیں۔

وہ افغان جرمن بین اقوام تعلقات اور افغانستان میں خواتین کو بااختیار بنانے کے موضوعات پر کئی کتابوں کی مصنفہ ہونے کے ساتھ ساتھ پناہ گزینوں، تارکین وطن اور بے گھری جیسے موضوعات کا احاطہ کرنے والے انسانیت سے متعلق قوانین کی پیشہ ور تربیت کار اور ناظمہ بھی ہیں۔

*ایک آزاد اور جمہوری افغانستان میرا خواب ہے جہاں ایک جدید آئین کے تحت شہری حقوق کو تحفظ حاصل ہو اور جہاں خواتین کو بھی زندگی کے ہر شعبے میں ہر شہری کے برابر شراکت کے حق کی ضمانت حاصل ہو۔

انھوں نے افغانستان کے مشرقی صوبے ننگرہار میں 400 سے زیادہ جواں سال خواتین کا ایک نیٹ ورک ترتیب دیا تاکہ وہ قریبی اضلاع میں گھریلو تشدد کا شکار ہونے والے افراد کو مدد فراہم کرسکیں۔

کووڈ-19 کی وبا کے دوران افواہوں کا بازار گرم ہوا تو سماجی و سیاسی کارکن مقدّسہ احمد زئی نے خود کو خواتین اور اُن کی برادریوں کی مدد کے لیے خود کو وقف کردیا۔ وہ افغان یوتھ پارلیمان کی ایک سابقہ رکن ہیں جہاں وہ خواتین اور بچوں کے حقوق کی بڑی شدّت و سرگرمی سے وکالت کرتی رہیں۔

2018 میں اقوام متحدہ کے ترقیاتی ادارے یونائیٹد نیشنز ڈیویلپمنٹ پروگرام (یو این ڈی پی) نے انھیں قیامِ امن اور تنازعات کے حل کے لیے ممتاز خواتین سے متعلق این- پیس ایوارڈ سے نوازا۔

*میں نے کبھی ایسی اچانک تبدیلی نہیں دیکھی۔ یوں لگا جیسے کبھی کسی حکومت کا وجود ہی نہیں تھا۔ اب نوجوان نسل کے لیے واحد اُمّید نظام کی اصلاح اور خلا کو پُر کیا جانا ہے ، مگر ایسا صرف بین الاقوامی مدد و حمایت سے ممکن ہوسکے گا۔

فاطمہ گیلانی اُن چار خواتین ’امن مذاکرات کاروں‘ میں سے ایک ہیں جنھوں نے ایک منصفانہ سیاسی نظام کے قیام کے لیے 2020 طالبان سے مذاکرات کیے۔ فاطمہ گیلانی ایک معروف سیاسی رہنما ہیں اور سرکردہ کارکن ہیں جو گذشتہ 43 برس سے انسانیت کی خدمت کے کام میں مصروف ہیں۔

وہ 1980 کی دہائی میں سوویت قبضے کے بعد افغان مزاحمت کے چند زنانہ چہروں میں سے ایک ہیں اور لندن میں اپنی جِلاوطنی کے زمانے میں افغان مجاہدین کی ترجمان رہی ہیں۔ وہ 2001 میں افغانستان پر امریکی قیادت میں کیے جانے والے حملے کے بعد وطن واپس آئیں جہاں انھوں نے نئے آئین کی تشکیل میں مدد دی۔

2005 سے 2016 تک وہ افغان ریڈ کراس سوسائٹی کی صدر رہیں اور اب بھی اس ادارے کے بورڈ کی رکن ہیں۔

*مجھے معنی خیز قومی مذاکرات کی اُمّید ہے جو حقیقی طور پر تعمیرِ قوم پر منتج ہوں گے۔

قانون ساز اور شمالی افغان صوبے جوزجان سے منتخب ہونے والی سابق رکنِ افغان پارلیمان حلیمہ صدف کریمی سیاست کا کئی برس کا تجربہ رکھتی ہیں۔

وہ اپنی ملک کی قریباً 70 خواتین اراکینِ پارلیمان میں سے ایک رہی ہیں اور ازبک اقلیت سے تعلق رکھنے والی واحد خاتون رکن اسمبلی بھی تھیں۔ پارلیمان میں وہ اپنی برادری کے حقوق کے لیے لڑتی رہیں۔ انھوں نے سیاسیات اور معیشت کے علوم میں ڈگری حاصل کی ہے۔ وہ خواتین کی حقوق کی ایک ممتاز کارکن ہیں جنہیں طالبان کی جانب سے متعدد بار دھمکیاں دی جا چکی ہیں اوراُس بنیاد پر وہ کئی بار اپنا ٹھکانہ بھی تبدیل کرتی رہی ہیں۔

یونیورسٹی میں زیرِ تعلیم اُن کے چھوٹے بھائی 2020 میں طالبان کے ہاتھوں ہلاک ہو چکے ہیں۔

*خودغرض حکومتیں ہمیشہ ابتدا ہی میں ناکام ہوجاتی ہیں۔ مجھے اُمّید ہے کہ افغان خواتین سیاسی، ثقافتی، معاشی، اقتصادی اور سماجی عمل میں شراکت سے اپنے انسانی حقوق حاصل کر لیں گی اور ایسا کرکے وہ ایک انسانی بحران کا راستہ روک دیں گی۔

قانون کی تعلیم حاصل کرنے اور کتابوں سے محبّت کرنے والی واحدہ امیری لائبریریئن بھی ہیں اور احتجاجی کارکن بھی۔ جب طالبان نے افغانستان میں طاقت حاصل کرلی اور وہ بھی واپس لائبریری اپنے کام ہر نہ جا سکیں۔ تو وہ بھی بے شمار خواتین کے ساتھ احتجاجی اجتماعی مارچ میں شامل ہونے کے لیے کابل کی سڑکوں پر نکل آئیں جس کا مقصد افغان خواتین کو کام اور تعلیم حاصل کرنے کا حق دلوانے کے لیے بین الاقوامی برادری سے مدد و حمایت طلب کرنا تھا۔

جب طالبان نے احتجاج کو غیرقانونی قرار دے دیا تو واحدہ امیری دیگر خواتین کے ساتھ بحث و مباحثے اور مطالعے کی خاطر دیگر خواتین سے آ ملیں۔

اُن کی لائبریری 2017 سے فعال تھی اور اُن کا کہنا ہے کہ اپنی کتابوں کے بغیر تو وہ اپنی شناخت ہی کھو چکی ہیں۔

*دنیا نے بطور انسان ہمارا احترام نہیں کیا۔ لیکن ایسے میں جب افغانستان تباہی سے دوچار ہے ہم اپنی اُمّید کو احتجاج، انصاف کے مطالبے اور کتب بینی کی حوصلہ افزائی کرکے زندہ رکھے ہوئے ہیں۔

حقوق نسواں کی سرگرم کارکن اور علمبردار ہدیٰ خاموش افغانستان کے سکولوں میں لڑکیوں کے لیے ماہواری کے موضوع پر ایک آگاہی منصوبہ چلاتی رہی ہیں جس کا عنوان تھا ’ماہواری کوئی ممنوعہ تصوّر نہیں‘۔ اس آگاہی مہم کا مقصد ماہواری یا حیض کے موضوع پر کھل کر بات کرنے کو فروغ دینا تھا۔

بےگھر ہوکر ایران پہنچ جانے والے اپنے افغان والدین کی اولاد ہدیٰ خاموش بالآخر اپنے وطن افغانستان واپس آئیں تو اپنے قدامت پرست دیگر رشتہ داروں کے نقطۂ نظر کے برخلاف انھیں تعلیم حاصل کرنے کے لیے اپنی والدہ کی جانب سے مدد و حمایت ملی۔ وہ شاعرہ اور صحافی بھی ہیں اور 2015 میں ریڈیو پریزینٹر بھی بن جانے پر انھوں نے افغان خواتین کے خلاف ناانصافیوں کو بھی اجاگر کیا۔ انھوں نے اپنے گاؤں کی دیگر خواتین کے لیے ایک تعلیمی منصوبے کا آغاز بھی کیا۔

طالبان کے قبضے کے بعد وہ ساتویں جماعت اور اس سے زیادہ تعلیمی سطح کی اُن لڑکیوں کے لیے ان دنوں تعلیمی نشستوں کا اہتمام بھی کرتی ہیں جن کے سکول جانے پر اب پابندی ہے۔

*ہر طرف محض اندھیرے کے باوجود 2021 ہی دراصل وہ سال ہے جب خواتین نے کوڑوں اور گولیوں کے سامنے کھڑے ہوکر اپنے حقوق براہ راست اُن سے طلب کیے جنہوں نے یہ حقوق چھین رکھے ہیں۔ میں تو اس سال کو سالِ اُمّید قرار دوں گی۔

افغان پولیس میں شمولیت کے تین برس بعد مومنہ ابراہیمی جنہیں مومنہ کربلائی کے نام سے جانا جاتا تھا ، اپنے افسران ہی کی جانب سے جنسی بدسلوکی کا نشانہ بنیں۔ پھر انھوں نے فیصلہ کیا کہ وہ اس وقت اپنے اس تجربے پر بھی بولیں گی اور افغان پولیس میں بدسلوکی کے دیگر الزامات پر بھی آواز اٹھائیں گی۔

تب ہی سے وہ دھمکیوں کے باوجود اپنے ساتھ ساتھ جنسی حملوں اور جنسی بدسلوکی کا شکار ہونے والے دیگر لوگوں کو انصاف کی فراہمی کی لڑائی لڑ رہی ہیں۔ انھوں نے بی بی سی کو بتایا کہ سمجھتی ہوں کہ کسی نہ کسی کو تو بولنا چاہیے پھر میں نے سوچا کہ وہ میں ہی ہوسکتی ہوں ، چاہے اس کی قیمت مجھے اپنی جان دے کر ہی کیوں نہ ادا کرنی پڑے۔

مومنہ ابراہیمی اُن ہزاروں افراد میں شامل ہیں جنھیں گزشتہ اگست میں طالبان کی واپسی کے بعد افغانستان سے نکال کر برطانیہ پہنچایا گیا ہے۔

*میری خواہش ہے کہ وہ تمام خواتین جو برسوں سے لڑ رہی تھیں، جنھوں نے تعلیم حاصل کر کے اپنے کریئر بنائے ہیں، وہ اپنے کام ہر واپس جا سکیں اور اُس قوّت سے آزادی حاصل کر سکیں جو لوگوں کے خلاف اپنی طاقت استعمال کر رہی ہے۔

افغانستان میں ہم جنس پرستوں یا دیگر جنسی میلان و رجحان رکھنے والے افراد کے حقوق کے لیے کام کرنا مشکلات سے بھرپور ہے مگر تمام تر مشکلات کے باوجود بصیرہ پیغام گذشتہ آٹھ برس سے صنفی مساوات اور صنفی حقوق کی سرگرم کارکن رہی ہیں۔

انھوں نے صنفی و جنسی آگاہی کے بارے میں کئی ورکشاپس کا انعقاد کیا اور بدسلوکی کا نشانہ بننے والے ہم جنس پرست افراد کو مشاورت اور طبّی علاج معالجے کے لیے مالی مدد بھی فراہم کی۔ انھوں نے خودکشی پر مائل یا خودکشی کے خطرات سے دوچار ہم جنس پرست افراد کو نفسیاتی علاج تک رسائی میں بھی مدد فراہم کی۔

اب آئرلینڈ میں رہائش پذیر بصیرہ پیغام مسلسل افغانستان کی ہم جنس برادری کو تسلیم کیے جانے اور اُن کے انسانی حقوق اور آزادی کی وکالت کر رہی ہیں۔

*مجھے اُمید ہے کہ افغانستان کے عوام اپنے مذہب ، صنف اور جنسی رجحان کے بارے میں سوچے بغیر آزادانہ سانس لینے کے قابل ہوسکیں گے۔ ہم خاموش نہیں رہیں گے۔ اور اپنی تمام تر کوششوں سے ہم ذہنیت کو بدل دینے میں کامیاب ہوجائیں گے۔

26 برس تک امریکہ میں جِلا وطن رہنے کے بعد محبوبہ سراج 2003 میں اپنے آبائی وطن افغانستان واپس پہنچیں اور تب ہی سے خواتین اور بچوں کے حقوق کے لیے سرگرم کئی تنظیموں کی شریک بانی اور سربراہ رہی ہیں جن میں بڑی منظم تنظیم افغان ویمن نیٹ ورک بھی شامل ہے جو ملک میں نوعمر خواتین کی تحریک کی بنیاد سمجھی جاتی ہے۔

انھوں نے اپنی زندگی گھریلو تشدد کا شکار ہونے والوں کو بااختیار بنانے، بچوں کی صحت و تعلیم کے لیے لڑتے رہنے اور بدعنوانی کے خلاف جنگ کرنے کے لیے وقف کر رکھی ہے۔

عالمی جریدے ٹائم نے انھیں ’2021 کے 100 سب سے زیادہ بااثر افراد‘ میں سے ایک قرار دیا ہے۔

*اپنے وطن کے لیے میری اوّلین خواہش امن ہے۔ میں اپنی بہنوں اور بیٹیوں کی آنکھوں میں دہشت کی جھلک نہیں دیکھنا چاہتی جس میں ایک غیریقینی مستقبل اُن کا منتظر ہو۔ بس بہت ہوگیا!

افغانستان کی صرف تین ضلعی کورنرز میں سے ایک ، سلیمہ مزاری نے اس برس شہ سرخیوں میں ایک بےخوف رہنما کے طور پر تب جگہ پائی جب وہ حکومت کی حامی ملیشیا کے ساتھ اگلے مورچوں پر لڑیں۔

ایک پناہ گزین کی حیثیت سے سلیمہ مزاری نے اپنی ڈگری ایران سے حاصل کی جس کے بعد وہ افغانستان واپس پہنچیں۔ 2018 میں وہ صوبۂ بلخ کے ضلع چارقنط کی گورنر مقرر ہوئیں جہاں انھوں نے 100 سے زائد طالبان باغیوں سے ہتھیار ڈالنے کے لیے مذاکرات کیے۔2021 میں اُن کے ضلعے نے طالبان کے خلاف زبردست، اہم، نمایاں اور معنی خیز مزاحمت کی اور طالبان کے ہاتھوں سقوطِ کابل تک اُن کا ضلع اُن چند اضلاع میں سے ایک تھا جہاں طالبان کا قبضہ نہیں ہو سکا تھا۔

اُن کے بارے میں گمان اور قیاس کیا گیا کہ شاید طالبان نے انھیں گرفتار کرلیا ہے مگر وہ کسی نہ کسی طرح امریکہ پہنچ جانے میں کامیاب ہو گئیں جہاں وہ اب اپنی دوبارہ آبادکاری کی منتظر ہیں۔

*مجھے اُمید ہے کہ وہ دن ضرور آئے گا جب عورت، ہزارہ، شیعہ اور فارسی بان ہونا، جو کہ سب میری شناخت کا حصّہ ہیں، میرے وطن میں جرم نہیں رہے گا۔

لڑکیوں اور خواتین میں حقِ تعلیم کے بارے میں آگاہی کو فروغ دینا افغان معلمہ شیلا انسان دوست کی اولین ترجیح ہے۔ خود انھوں نے مذہبی تعلیمات میں ڈگری حاصل کی ہے اور سکولوں میں تدریس میں مصروف رہی ہیں۔

وہ سیاسی و سماجی امور میں خواتین کے کردار کے فروغ کے لیے سرگرم رہی ہیں اور خواتین کے کام کرنے اور تعلیم حاصل کرنے کے حق کے بارے میں افغان میڈیا کی نشریات میں بولتی ہوئی دکھائی دیتی رہی ہیں۔ حال ہی میں وہ کابل میں ہونے والے ایک عوامی مظاہرے میں شامل تھیں جہاں وہ ملک میں خواتین کے خلاف ظلم و ستم اور جور و جبر پر احتجاج کے طور کفن نما سفید چادر پہن کر شریک ہوئیں۔

ایک معلّمہ ہونے کے ساتھ ساتھ وہ افغانستان میں خواتین کی کئی تنظیموں کی بھی رکن ہیں۔

*میں خواتین کو سیاسی ، سماجی اور اقتصادی امور میں شریک ہوتے دیکھنا چاہتی ہوں۔ خواتین کے حقِ تعلیم کو برقرار رہتے اور خواتین اور اقلیتوں کے خلاف تشدد اور عدم مساوات کو جڑ سے اکھڑتے ہوئے دیکھنا چاہتی ہوں۔

مرل کا خاندان نہیں چاہتا تھا کہ وہ خواتین کی حقوق کے لیے سرگرم ہوں یا شہریوں کی معاشرتی تنظیموں کا حصّہ بنیں۔ وہ سمجھتے تھے کہ مرل کو ایک عورت ہونے کے ناطے کام کرنے کے لیے باہر نہیں جانا چاہیے مگر مرل نے کسی نہ کسی طرح یہ کر ہی دکھایا۔

مرل 2004 سے ہی اپنے حقوق کے بارے میں جان لینے، کام کرنے کے لیے باہر جانے اور مالی آزادی حاصل کرنے کے لیے مقامی خواتین کی حوصلہ افزائی کر رہی ہیں۔

وہ مصافاتی اور دیہی علاقوں کی اُن خواتین کے ساتھ بھی کام کررہی ہیں جو گھریلو تشدد کا شکار ہیں۔ وہ انصاف کے حصول کے لیے ان خواتین کی مدد کررہی ہیں اور یقینی بنا رہی ہیں کہ انھیں پناہ میسّر آ جائے۔

*پہلے میں سوچا کہ ہم نے سب کچھ کھو دیا ہے اور مایوس ہو گئی مگر جب میں نے وہ سب یاد کیا جو ہم کر چکے ہیں تو پھر میں نے تجدیدِ عزم کیا، سب کچھ جاری رکھنے کے لیے۔ میں شکست تسلیم نہیں کروں گی، ہار نہیں مانوں گی۔ مستقبل اُن کا ہے جو انسانیت اور امن چاہتے ہیں۔

افغانستان کی ایک قانون دان کی حیثیت سے معصومہ عدلیہ کے ساتھ کام کرتے ہوئے ثبوت و شواہد اکٹھے کرنے اور قانونی مقدمات کو مضبوط بنانے کی کوشش کرتی رہی ہیں۔ شعبۂ قانون میں ڈگری حاصل کرنے والی معصومہ گذشتہ 20 برس میں تعلیم حاصل کرنے والی بہت سی خواتین میں شامل رہیں اور اٹارنی جنرل کے دفتر میں پانچ برس سے زیادہ عرصے تک کام کرتے ہوئے وہ بہت خوش اور متفخّر تھیں کہ وہ اپنے لوگوں کی خدمت کر رہی ہیں۔

اگست میں قبضے کے بعد طالبان نے جیل میں بند عادی جرائم پیشہ اور اسلامی شدّت پسندوں سمیت بہت سے قیدیوں کو رہا کر دیا۔ کس کے بعد اب انسانی حقوق کے بہت سے عالمی اداروں کا کہنا ہے کہ طالبان کی جانب سے سرکاری ملازمین کو عام معافی دینے کے اعلان کے باوجود بھی ماورائے عدالت قتل کی کئی وارداتیں اور اغوا کے واقعات رونما ہو چکے ہیں۔

معصومہ اب روپوش ہیں اور نہیں جانتیں کہ آگے اب کیا ہونے والا ہے۔

*خواتین اور لڑکیاں دنیا کی آدھی آبادی کی نمائندہ ہیں۔ اگر انھیں مواقع فراہم کیے جائیں تو خواتین میری طرح اپنے لوگوں اور ملک کی خدمت کر سکتی ہیں۔

کئی برس تک صدارتی محل میں اور دیگر کئی عہدوں ہر کام کرنے کے بعد رضیہ بارکزئی اس وقت بےروزگار ہوئیں جب طالبان افغانستان میں برسرِاقتدار آ گئے۔

اس کے بعد سے وہ باقاعدگی سے کابل میں ہونے والے مظاہروں میں شرکت کرتی رہی ہیں۔ یہ مظاہرے ایسی خواتین کر رہی ہیں جو کام کرنے اور تعلیم حاصل کرنے کا حق مانگ رہی ہیں۔ وہ #AfghanWomenExist نامی مہم کا بھی حصہ رہی ہیں۔ اس مہم کے تحت اس بات کو اجاگر کیا جا رہا ہے کہ خوف کی وجہ سے افغان خواتین سوشل میڈیا سے کنارہ کشی اختیار کر رہی ہیں۔

رضیہ بارکزئی نے سیاسیات اور قانون کی تعلیم کے علاوہ ایم بی اے بھی کیا ہے۔ بی بی سی کے لیے لکھے گئے ایک خط میں انھوں نے احتجاج کے بارے میں بات کرتے ہوئے لکھا ’آزادی کے حصول کے دوران جان دے دینا غلامی کی زندگی سے بہتر ہے۔‘

*افغانستان کے نوجوان اور تعلیم یافتہ شہری خصوصاً بہادر خواتین ایک دن آزادی کے علمبردار ہوں گے۔ یہ میں روزانہ سڑکوں پر احتجاج کے دوران دیکھتی ہوں۔