عالمی وبا کے دور میں دوسرے حج کی تصویری جھلکیاں

کورونا وائرس کی وبا کے آغاز کے بعد سے منعقد ہونے والے دوسرے حج کے لیے حاجیوں نے سنیچر کے روز سے مکہ پہنچنا شروع کر دیا ہے۔

اسلام کے مقدس ترین مقام پر پہنچنے والے حاجیوں سے سماجی فاصلہ برقرار رکھنے اور ماسکس پہننا لازمی قرار دیا گیا ہے۔

اس سال حاجیوں کی تعداد گذشتہ برس کے مقابلے میں تو زیادہ ہے لیکن عام دنوں میں ہونے والے حج سے خاصی محدود ہے۔

اس سال بھی حج صرف سعودی عرب کے رہائشیوں کے لیے محدود کیا گیا ہے اور ویکسین لگوانے والے پانچ لاکھ 50 ہزار امیدواروں میں سے 60 ہزار شہریوں کا انتخاب کیا گیا ہے۔

اس فہرست میں داخلے کے لیے جن شرائط پر عمل کرنا ضروری تھا ان میں شہریوں کی عمر 18 سے 65 سال کے درمیان ہونا، ویکسین کی دونوں خوراکیں لگوانا اور وہ کسی بھی دائمی مرض میں مبتلا نہ ہوں۔

جن افراد کو اس مرتبہ حج کرنے کی اجازت ملی ہے ان کی مکہ جانے سے قبل تصاویر اتاری گئی تھی جب وہ مسجد حرام جانے کے لیے سرکاری ٹرانسپورٹ کا انتظار کر رہے تھے۔

حاجی مسجد حرام پہنچ کر سات مرتبہ خانہ کعبہ کا طواف کرتے ہیں۔

حاجی اس کے بعد پانچ روز کے لیے دیگر مناسک حج مکمل کرنے کے لیے قریبی مقدس مقامات جائیں گے۔

حج دنیا کی سب بڑے مذہبی اجتماعات میں سے ایک ہے جس میں سنہ 2019 میں تقریباً 25 لاکھ افراد نے شرکت کی تھی۔

حج اسلام کے پانچ ستونوں میں سے ایک ہے اور اسے استطاعت رکھنے والے مسلمانوں کے لیے کم از کم زندگی میں ایک مرتبہ کرنے کا حکم دیا گیا ہے۔

ملک کی وزارتِ حج کے مطابق عوامی وبا کے باعث اس سال حج حفظانِ صحت کے اصولوں کو مدِنظر رکھتے ہوئے منعقد ہو رہا ہے۔

ہر تین گھنٹے بعد چھ ہزار افراد کو طواف کے اجازت دی جائے گی اور ایک گروپ کے جانے کے بعد اس جگہ کی صفائی بھی کی جائے گی۔

حکام کا یہ بھی کہنا تھا کہ حاجیوں کو 20 افراد کی گروپس میں بانٹا گیا تھا اور سماجی فاصلہ برقرار رکھنے کے لیے علیحدہ راستے بنائے گئے تھے۔

اندازے کے مطابق گذشتہ برس جولائی میں ہونے والے حج میں 10 ہزار سعودی شہریوں نے شرکت کی تھی اور وبا کے پھیلاؤ سے متعلق اطلاعات موصول نہیں ہوئی تھیں۔

سعودی عرب میں اب تک پانچ لاکھ کورونا وائرس کیسز رپورٹ ہوئے ہیں اور آٹھ ہزار افراد اس وبا کے باعث ہلاک بھی ہوئے ہیں۔ اب تک ملک میں دو کروڑ 15 لاکھ ویکسینز لگائی جا چکی ہیں تاہم آور ورلڈ ان ڈیٹا کے مطابق اب تک ملک کی صرف 10 فیصد آبادی کو ویکسین کی دونوں خوراکیں دی گئی ہیں۔

تمام تصاویر کے جملہ حقوق محفوظ ہیں۔

.