سعودی عرب کی تیل کی تنصیبات میں تباہی کے مناظر

سعودی عرب میں بقیق اور خریص کے علاقوں میں سعودی تیل کمپنی 'آرامکو' کی تنصیبات پر سنیچر کو ہونے والے حملوں کے بعد جمعے کو وہاں میڈیا کو لے جایا گیا۔ تنصیبات کی مرمت کا کام شروع کر دیا گیا ہے۔ سعودی تنصیبات کے مکمل طور پر بحال ہونے میں کئی ہفتے لگ سکتے ہیں۔

بقیق میں لی گئی اس تصویر میں ایک آئل ٹینکر کے تباہ شدہ حصے کو دیکھا جا سکتا ہے۔ سعودی عرب کا الزام ہے کہ اس کے پاس ایسے شواہد موجود ہیں جو یہ ثابت کرتے ہیں کہ اُس کی تیل تنصیبات پر حملے کے پیچھے ایران کا ہاتھ ہے۔

یہ بھی پڑھیے

سعودی تیل کی کہانی، یہ دولت کب آئی اور کب تک رہے گی؟

ایران سعودی عرب پر حملہ کرنے کا خطرہ کیوں مول لے گا؟

مشرق وسطیٰ: اسلحہ بردار ڈرونز کون استعمال کر رہا ہے؟

ایران نے حملوں کے الزامات کی تردید کی ہے۔ اس سے پہلے یمن میں ایران کے حامی حوثی باغی کہہ چکے ہیں کہ ان حملوں کے پیچھے وہ ہیں۔ امریکہ بھی اپنے اس الزام پر قائم ہے کہ ان حملوں کے پیچھے ایران ہے۔

سعودی وزارت دفاع کا دعویٰ ہے کہ خریص میں چار میزائل داغے گئے تھے۔

سعودی عرب میں سنیچر کو تیل کی تنصیبات پر ہونے والے حملوں کے بعد پیر کو بازار کھلتے ہی عالمی منڈی میں تیل کی قیمت گذشتہ چار ماہ کی بلند ترین سطح یعنی 68 ڈالر فی بیرل کے لگ بھگ جا پہنچی تھی۔

اس حملے کے بعد سے ایک مرتبہ پھر سعودی عرب اور ایران میں الفاظ کی جنگ جاری ہے۔

۔