مصر کا ’ٹیڑھا اہرام‘ سیاحوں کے لیے کھول دیا گیا

مصر میں حکام نے ملک میں سیاحت کے وسیع پیمانے پر فروغ کے لیے دارالحکومت قاہرہ کے نزدیک واقع ’ٹیڑھا‘ یا ’بینت اہرام‘ کو سیاحوں کے لیے کھول دیا ہے۔

دہشر میں واقع اس اہرام کو تقریباً 2600 قبل مسیح میں ’سنفرو‘ یا ’سورس‘ نامی فرعون کے لیے تعمیر کیا گیا تھا۔

درحقیقت اس اہرام کو 54 ڈگری زاویے کے ساتھ ڈیزائن کیا گیا لیکن یہ ایسی مٹی پر تعمیر کیا گیا تھا جس میں ٹھہراؤ اور استحکام کے مسائل تھے۔

لہٰذا اس کا حل ہرم کے زاویے کو 43 ڈگری پر رکھ کر کیا گیا۔

اس اہرام کی زاویائی شکل شمال میں واقع سیدھی تکون کی شکل والے سرخ اہرام سے مختلف ہے۔

سیاح اب شمال کی جانب سے 79 میٹر لمبی تنگ سرنگ کے ذریعے اہرام کے اندر گہرائی میں موجود دو حجروں تک پہنچ سکتے ہیں۔

آثار قدیمہ کے ماہرین نے دہسر میں ایک سال تک کی جانی والی کھدائی کے دوران دریافت ہونے والے مجسمے، چہرے پر ڈالے جانے والے نقاب اور آلات کو بھی سیاحوں کے لیے نمائش کا حصہ بنایا ہے۔

مصر میں سیاحت ملک کی آمدنی کا ایک اہم ذریعہ ہے.

۔