کولگیٹ ٹوتھ پیسٹ کے ’گمراہ کن‘ اشتہار پر برطانیہ میں پابندی
،تصویر کا ذریعہGetty Images
برطانیہ میں کولگیٹ ٹوتھ پیسٹ کے اس اشتہار پر پابندی عائد کر دی گئی ہے جس میں خراب دانتوں کو فوری طور پر ٹھیک کرنے کا دعویٰ کیا گیا تھا۔ اس اشتہار کو ’گمراہ کن‘ قرار دیا گیا ہے۔
ایڈورٹائزنگ سٹنیڈرڈ اتھارٹیز کو ’کولیگیٹ سینسیٹو ریپیئر اینڈ پریوینٹ ٹوتھ پیسٹ‘ کے اشتہار کے بارے میں چھ شکایات موصول ہوئیں۔
کمپنی کا کہنا ہے کہ یہ ٹوتھ پیسٹ دانتوں پر ایک تہہ بنا دیتا ہے جو اسے ٹھیک کر دیتی ہے۔
کولگیٹ پامولیو کے گذشتہ سات برسوں میں جاری ہونے والے نو اشتہاروں پر پابندی عائد کی گئی ہے جن میں سے پانچ دانتوں کے لیے بنی مصنوعات کے بارے میں تھے۔
مذکورہ اشتہار برطانیہ میں اگست میں نشر کیا گیا جس میں دعویٰ کیا گیا تھا کہ اس ٹوتھ پیسٹ کے دن میں دو مرتبہ انگلیوں کی مدد سے دانتوں پر استعمال سے حساسیت پر قابو پایا جا سکتا ہے۔
اسی بارے میں
End of سب سے زیادہ پڑھی جانے والی
کولگیٹ پامولیو کا کہنا ہے کہ اس کے کلینیکل مطالعے نے ثابت کیا ہے کہ اس ٹوتھ پیسٹ نے دانتوں میں خورد بین سے دکھائی دینے والے انتہائی باریک سوراخوں کو بھر دیا تھا۔
کمپنی کے مطابق ان کا اشتہار کافی واضح تھا کہ ان کا ٹوتھ پیسٹ دانتوں کو ایک ڈھال فراہم کرتا ہے اور حساسیت سے ہونے والے درد سے نجات دلاتا ہے۔
تاہم ایڈورٹائزنگ سٹنیڈرڈ اتھارٹیز کا کہنا ہے کہ یہ سب دانت کی ’مرمت‘ ہرگز نہیں ہے اور کمپنی نے اشتہار میں یہی دعویٰ کیا ہے کہ یہ ٹوتھ پیسٹ ’دانت کی فوری مرمت‘ کرتا ہے۔
ادارے کے مطابق یہ اشتہار موجودہ دعوے کے ساتھ نشر نہیں کیا جا سکتا اور کمپنی ایسے کسی بھی دعوے سے قبل ثبوت فراہم کرنے کی مجاز ہے۔
اس سے پہلے سنہ 2014 میں کمپنی کے ایک اشتہار پر اس لیے پابندی عائد کی گئی تھی کیونکہ اس میں کہا گیا تھا کہ ان کا ایک ٹوتھ برش دانت صاف کرنے کے لیے ’سونک ویوو‘ استعمال کرتا ہے۔
پابندی کا سامنا کرنے والے ایک اشتہار میں بے انتہا سفیدی لانے والا ٹوتھ پیسٹ دکھایا گیا جبکہ ایک عورت یہ کہتی دکھائی گئی کہ وہ نرس ہے جبکہ وہ دراصل ایک اداکارہ تھی۔
