دنیا کا مہنگا ترین جنگی جہاز گر کر تباہ

امریکی فوج کو اپنے مہنگے ترین ایف-35 فائٹر جیٹ پروگرام میں پہلا نقصان اٹھانا پڑا جب سنیچر کو ان کا ایک ایف - 35 بی جیٹ جنوبی طیارہ کیرولینا میں گر کر تباہ ہو گیا۔

امریکی فوج کے ادارے میرین کور نے کہا کہ پائلٹ بحفاظت طیارے سے پیراشوٹ کے ذریعے نکلنے میں کامیاب رہا اور اس حادثے میں کوئی جانی نقصان نہیں ہوا ہے۔

میرن کور نے بیان میں کہا ہے کہ طیارے کے حادثے کی جانچ جاری ہے۔

ایف - 35 دنیا میں اپنی قسم کا سب سے وسیع اور مہنگا فوجی اسلحہ سازی کا پروگرام ہے۔

عالمی سطح پر اس کے تین ہزار طیارے فروخت کرنے کا منصوبہ ہے اور یہ پروگرام 30 سے 40 سال تک جاری رہے گا۔

لیکن اس پروگرام کو اس کی قیمت اور جنگی صلاحیت کی بنیاد پر تنقید کا نشانہ بنایا گیا ہے۔

جو جیٹ طیارہ حادثے کا شکار ہوا ہے اس کی قیمت دس کروڑ ڈالر بتائی جا رہی ہے۔

خبررساں ادارے روئٹرز کے مطابق جمعے کو پینٹاگون کے ایک نئے معاہدے میں بتایا گیا ہے کہ 141 ایف - 35 جیٹ طیاروں کی قمیت تقریباً نو کروڑ ڈالر فی طیارہ ہے۔

یہ ماڈل ایف - 35 طیاروں کی تین اقسام میں سے ایک قسم ہے جو کہ اپنے کام پر معمور ہے۔

جمعرات کو امریکہ نے ایف - 35 بی کا افغانستان میں طالبان کے خلاف پہلی بار استعمال کیا۔ اس سے چار ماہ قبل اسرائیلی فوج نے کہا تھا کہ اس نے ایف - 35 اے کو دو مختلف حملوں میں استعمال کیا تھا۔

امریکی صدر ڈونلڈ ٹرمپ نے بار بار ایف - 35 جیٹ طیاروں کی یہ کہتے ہوئے تعریف کی ہے کہ دشمن اسے 'دیکھ نہیں سکتا۔' جبکہ یہ جیٹ ایسا نہیں ہے کہ نہ نظر آئے۔ اس کے بنیادی کنٹریکٹر لاک ہیڈ مارٹن کا کہنا ہے کہ 'چھپنے کی اس کی جدید صلاحیت' کی وجہ سے یہ راڈار کی گرفت سے باہر رہتا ہے۔