جرمنی کے چڑیا گھر سے چار شیر اور تیندوا فرار، شہریوں کو گھروں میں رہنے کی ہدایت
،تصویر کا ذریعہAFP
پولیس نے کہا ہے کہ جرمنی کے شہر لوئنباخ کے ایک چڑیا گھر سے دو ببر شیر، دو شیر اور ایک تیندوا بھاگ گئے۔
مقامی حکام نے مقامی شہریوں کو خبردار کیا ہے کہ وہ اپنے گھروں میں رہیں اور اگر انھیں کوئی درندہ نظر آئے تو فوراً پولیس کو مطلع کریں۔
ایک مقامی ملازم نے خبررساں ادارے اے ایف پی کو بتایا کہ اس نجی چڑیا گھر سے ایک ریچھ بھی بھاگ نکلا تھا جسے بعد میں گولی مار کر ہلاک کر دیا گیا۔
جرمن میڈیا نے کہا ہے کہ جانوروں کو رات کو ایک طوفان کے نتیجے میں آنے والے سیلاب کے بعد بھاگنے کا موقع مل گیا جس کی وجہ سے ان کے احاطے کے جنگلے متاثر ہوئے تھے۔
اس بارے میں مزید پڑھیے
یہ واضح نہیں ہے کہ یہ مفرور جانور ابھی تک اسی علاقے میں موجود ہیں یا کہیں اور چلے گئے ہیں۔ پولیس، فائر فائٹر اور جانوروں کے ڈاکٹر انھیں تلاش کر رہے ہیں۔
End of سب سے زیادہ پڑھی جانے والی
یہ چڑیا گھر والپوٹ خاندان کی ملکیت ہے اور اس کا رقبہ 74 ایکڑ پر محیط ہے اور اس میں 60 نسلوں کے جانور رہتے ہیں، جن میں سائبیریا کے شیر اور ببر شیر شامل ہیں۔
یہ چڑیا گھر 1965 میں قائم ہوا تھا اور یہاں ہر سال 70 ہزار لوگ آتے ہیں۔
دو سال پہلے مشرقی جرمنی کے شہر لائبسِگ سے دو شیر فرار ہو گئے تھے۔ ایک کو پکڑ لیا گیا تھا جب کہ دوسرا مار دیا گیا تھا۔
