’دنیا میں لڑکوں کے برعکس لڑکیوں سے 40 فیصد زیادہ گھریلو کام کرایا جاتا ہے‘
،تصویر کا ذریعہGetty Images
اقوام متحدہ کی ایک رپورٹ کے مطابق دنیا میں لڑکوں کے برعکس لڑکیاں بلامعاوضہ گھریلو کاج پر 40 فیصد زیادہ وقت صرف کرتے ہیں۔
اقوام متحدہ میں بچوں کی فلاح و بہود کے لیے کام کرنے والے ادارے یونیسیف کے مطابق یومیہ دنیا میں لڑکیوں اور لڑکوں کے محنت کرنے کے دورانیے میں 16 کروڑ گھنٹوں کا فرق ہے۔
رپورٹ کے مطابق تین میں سے دو لڑکیاں گھر میں کھانا پکاتی ہیں اور تقریباً نصف پینے کا پانی یا آگ جلانے کے لیے لڑکیاں جمع کرتی ہیں۔
رپورٹ میں مزید کہا گیا ہے کہ اس کے علاوہ لڑکیاں ایسے کام بھی سرانجام دیتی ہیں جو زیادہ نمایاں نہیں ہوتے، جس میں بچوں اور بڑوں کی دیکھ بھال کرنا شامل ہے۔
،تصویر کا ذریعہAFP
رپورٹ میں یہ بات بھی سامنے آئی کہ عمر بڑھنے کے ساتھ ساتھ لڑکیوں کے گھریلو کام کرنے کے دورانیے میں اضافہ ہوتا ہے۔
اس میں پانچ سے نو برس کی عمر میں گھریلو کام کاج پر 30 فیصد اور 14 برس تک 50 فیصد اضافی وقت صرف ہوتا ہے۔
رپورٹ میں لڑکیوں کو گھریلو کام کاج کے دوران دریش خطرات کے بارے میں بات کرتے ہوئے کہا گیا ہے کہ پانی اور آگ جلانے کے لیے لکڑیوں کے لیے باہر جانا انھیں جنسی تشدد کے خطرے سے دوچار کر دیتا ہے۔
End of سب سے زیادہ پڑھی جانے والی
صومالیہ میں 10 سے 14 برس کی لڑکیاں ہفتہ بھر میں اوسطً گھریلو کاموں پر 26 گھنٹے صرف کرتی ہیں اور یہ شرح دنیا میں سب سے زیادہ ہے۔
برکینا فاسو اور یمن میں بھی لڑکیوں اور لڑکوں کے محنت مزدوری کرنے کے دورانیے میں نمایاں فرق ہے۔
یونیسیف کی اہلکار انجو ملہوترا کے مطابق اس میں لڑکیاں بہت سارے مواقعوں کو قربان کر دیتی ہیں جس میں پڑھائی اور اپنے بچپن سے لطف اندوز ہونا شامل ہے۔
انھوں نے کہا ہے کہ بچوں سے کام کرانے میں غیر مصنفانہ تقسیم جنس کے بارے میں گھسے پٹے خیالات و رسم رواج کو زندہ رکھتی ہے اور اس سے نسل در نسل خواتین اور لڑکیوں پر دہرا دباؤ پڑتا ہے۔
رپورٹ میں تشدد، بچوں کی شادی، تعلیم، جسمانی اعضا کاٹنے کے اعداد و شمار جمع کیے گئے ہیں اور اس کے بارے میں جامع رپورٹ 11 اکتوبر کو بچوں کے عالمی دن کے موقع پر جاری کی جائے گی۔
