عبدالرشید شکور بی بی سی اردو ڈاٹ کام، کراچی

	سری لنکا کی ٹیم بیس جنوری سے پاکستان کا دورہ کرے گی

خبر رساں ادارے پریس ٹرسٹ آف انڈیا نے کولمبو سے خبر دی ہے کہ سری لنکا کے صدر مہندا راجاپا کسے نے وزیر خارجہ روہیتھا بوگولگاما سے جمعہ کو اس معاملے پر بات کی جن کا کہنا تھا کہ سری لنکا کی کرکٹ ٹیم کو پاکستان کا دورہ ضرور کرنا چاہئے۔

خبر میں یہ بھی کہا گیا ہے کہ وزیر خارجہ نے صدر سے ملاقات سے قبل وزیر کھیل سے بھی بات کی جنہوں نے اس سے قبل اس دورے کو آئی سی سی کی سکیورٹی کلیئرنس سے مشروط قرار دیا تھا۔

سری لنکا کے وزیرخارجہ نے دورے کے بارے میں فیصلہ کرنے سے قبل کولمبو میں پاکستان کے قائم مقام ہائی کمشنرفضل الرحمن قاضی سے بھی رابطہ کیا تھا۔

سری لنکا کی کرکٹ ٹیم بیس جنوری سے پچیس فروری تک پاکستان کا دورہ کرے گی۔

واضح رہے کہ سری لنکن وزیر کھیل کی جانب سے سری لنکن کرکٹ بورڈ کی عبوری انتظامیہ کو برطرف کیے جانے کے بعد سری لنکن ٹیم کا دورۂ پاکستان خطرے سے دوچار ہوگیا تھا۔

پاکستان کرکٹ بورڈ کے چیئرمین اعجاز بٹ اور چیف آپریٹنگ آفیسر سلیم الطاف اس وقت ایشین کرکٹ کونسل کے اجلاس میں شرکت کے لئے کوالالمپور میں ہیں۔

دونوں نے ملائشیا روانگی سے قبل کہا تھا کہ سری لنکن ٹیم کے دورے کو ممکن بنانے کے لئے وہ سری لنکن کرکٹ بورڈ کے حکام سے بات کریں گے اور اگر ضروری ہوا تو اس ضمن میں حکومت سے بھی مدد حاصل کی جائے گی۔

پاکستان کرکٹ بورڈ کے ترجمان نے بی بی سی کو بتایا کہ سری لنکا کی طرف سے دورے کے بارے میں ابھی باضابطہ طور مطلع نہیں کیا گیا ہے۔

سری لنکا کی ٹیم اس وقت بنگلہ دیش میں ہے۔ کپتان مہیلا جے وردھنے کہہ چکے ہیں کہ اگر ان کی حکومت نے اس دورے کی اجازت دے دی تو انہیں پاکستان جاکر کھیلنے میں خوشی ہوگی۔