سری لنکا تین ٹیسٹ میچ، تین ایک روزہ میچ اور ایک ٹوئنٹی ٹوئنٹی میچ کھیلے گی

پی سی بی کے چیف آپریٹنگ آفیسر سلیم الطاف سری لنکا کی ٹیم کا دورۂ پاکستان کی تصدیق کرتے ہوئے کہا ’سری لنکا پاکستان کا دورہ کرنے کے لیے راضی ہے۔ ہم ان کے دورے کی تاریخوں اور دیگر معاملات کو حتمی شکل دے رہے ہیں۔ سری لنکا کا دورہ بنگلہ دیش جنوری کے تیسرے ہفتے میں ختم ہوگا اور وہ سیدھے پاکستان آ جائیں گے۔‘

سری لنکا کی ٹیم پاکستان میں تین ٹیسٹ میچ، تین ایک روزہ میچ اور ایک ٹوئنٹی ٹوئنٹی میچ کھیلے گی۔

سری لنکا کی ٹیم انیس جنوری کو کراچی پہنچے گی جہاں وہ ایک ٹوئنٹی ٹوئنٹی میچ کھیلے گی۔ اس کے بعد وہ لاہور میں یکے بعد دیگرے تین ایک روزہ میچ کھیلے گی اور اس کے بعد ایک ٹیسٹ میچ کھیلے گی۔

اس کے بعد ملتان میں ایک ٹیسٹ میچ اور پھر کراچی میں آخری ٹیسٹ میچ کھیلے گی۔

واضح رہے کہ جمعرات کو بھارت کرکٹ بورڈ نے ممبئی حملوں کے بعد حکومت کے کہنے پر پاکستان کا دورہ منسوخ کردیا۔