عبدالرشید شکور بی بی سی اردو ڈاٹ کام، کراچی

	محمد آصف کو تیس اگست کے روز طلب کیا تھا لیکن ویزا نہ ملنے کے سبب پیش نہ ہوسکے تھے

آئی پی ایل کا ڈرگ ٹریبونل سنیل گواسکر، شریش گپتے اور ڈاکٹر روی بپت پر مشتمل ہے۔

واضح رہے کہ آئی پی ایل میں دہلی کی طرف سے کھیلتے ہوئے محمد آصف کا ڈوپ ٹیسٹ مثبت آیا تھا جس کے بعد انہوں نے اپنے یورین کے بی سمپل کے ٹیسٹ پر اصرار کیا تھا۔ اس مقصد کے لیے وہ سوئٹزر لینڈ گئے تھے لیکن ان کا دوسرا ڈوپ ٹیسٹ بھی مثبت رہا تھا۔

ٹریبونل نے محمد آصف کو تیس اگست کو طلب کیا تھا لیکن بھارتی ویزا نہ ملنے کے سبب وہ اس روز پیش نہیں ہوسکے تھے۔

محمد آصف کے ساتھ ان کے وکیل شاہد کریم اور ڈوپنگ کے ماہر ڈاکٹر گراہم ڈورگن بھارت جائیں گے۔

اگر ٹریبونل محمد آصف کی وضاحت سے مطمئن نہ ہوا تو ان کو دو سالہ پابندی کا سامنا ہوسکتا ہے تاہم ماہرین کا خیال ہے کہ دونوں یورین سمپلز میں ممنوعہ دوا نینڈرولن کی مقدار مختلف رہی ہے لہذا محمد آصف سزا سے بچ جائیں گے۔

دوسال قبل بھی محمد آصف کو ممنوعہ قوت بخش ادویات کے استعمال پر پاکستان کرکٹ بورڈ کی طرف سے پابندی کا سامنا کرنا پڑا تھا لیکن تیکنیکی بنیاد پر وہ سزا سے بچ گئے تھے۔