عبدالرشید شکور بی بی سی اردو ڈاٹ کام، کراچی

	آصف پر 2006ء میں بھی مثبت ڈوپ ٹیسٹ کی وجہ سے ایک سال کی پابندی عائد کی گئی تھی جو بعد میں ختم کردی گئی تھی

واضح رہے کہ محمد آصف کو چھ اگست کو سوئٹزرلینڈ کی لیبارٹری میں پیش ہونا تھا۔ اس سے قبل انہیں اٹھائیس جولائی کو بی سیمپل کےتجزیے کے لیے سوئٹزرلینڈ میں موجود ہونے کے لیے کہا گیا تھا لیکن دونوں بار محمد آصف کے وکیل نے یہ مؤقف اختیار کیا کہ بروقت ویزا نہ ملنے کے سبب وہ ان تاریخوں میں پیش نہیں ہوسکتے۔

محمد آصف نے بی بی سی کو بتایا کہ انہوں نے آئی پی ایل سے درخواست کی ہے کہ ویزا نہ ملنے کے سبب وہ چھ اگست کو بھی سوئٹزرلینڈ نہیں پہنچ سکتے لہذا بی سیمپل کے ٹیسٹ کی تاریخ آگے کر دی جائے۔

جواب کا انتظار  سوئس سفارتخانے نے بتایا ہے کہ اتنی جلدی ویزا دیا جانا ممکن نہیں جس کے بعد بی سمپل کے ٹیسٹ کی تاریخ مزید آگے بڑھانے کے لیے آئی پی ایل سے درخواست کی گئی ہے اور اس کے جواب کا انتظار ہے

محمد آصف کے وکیل شاہد کریم نے بی بی سی کو بتایا کہ سوئس سفارتخانے نے انہیں مطلع کیا ہے کہ اتنی جلدی ویزا دیا جانا ممکن نہیں جس کے بعد بی سمپل کے ٹیسٹ کی تاریخ مزید آگے بڑھانے کے لیے آئی پی ایل سے درخواست کی گئی ہے اور اس کے جواب کا انتظار ہے۔

آئی پی ایل کے دوران محمد آصف کا ڈوپ ٹیسٹ مثبت پایا گیا تھا۔
ڈوپنگ کے قواعد وضوابط کے تحت کھلاڑی کو یہ حق حاصل ہوتا ہے کہ وہ پہلا نتیجہ مثبت آنے کے بعد اسے چیلنج کرتے ہوئے بی سمپل کے تجزیئے کی درخواست کرسکتا ہے۔

دوسری جانب محمد آصف کو دبئی ائرپورٹ پر مبینہ طور پر مشکوک شے کی برآمدگی پر پاکستان کرکٹ بورڈ کی تحقیقاتی رپورٹ کا بھی انتظار ہے۔

کرکٹ بورڈ کی تین رکنی تحقیقاتی کمیٹی نے رپورٹ تیار کرلی ہے جو پی سی بی کے چیئرمین کی وطن واپسی پر انہیں پیش کردی جائے گی۔

محمد آصف پر 2006ء میں بھی مثبت ڈوپ ٹیسٹ کی وجہ سے ایک سال کی پابندی عائد کی گئی تھی جو بعد میں ختم کردی گئی تھی۔