شہزاد ملک بی بی سی اردو ڈاٹ کام، اسلام آباد

	مغربی ممالک کی بعض ٹیموں کے کھلاڑیوں نے پاکستان میں سکیورٹی کے معاملے پر تحفظات کا اظہار کیا ہے

اس چیمپیئنز ٹرافی کے سلسلے میں کیے جانے والے اقدامات کا جائزہ لینے کے لیے سنیچر کے روز وزارت داخلہ کے ایڈیشنل سیکرٹری امتیاز قاضی کی صدارت میں ایک اجلاس ہوا جس میں انٹرنیشنل کرکٹ کونسل کے سکیورٹی کنسلٹنٹ سمیت سندھ اور پنجاب کی پولیس کے اعلی افسران نے شرکت کی۔

اجلاس کے شرکاء کو اُن حفاظتی اقدامات کے بارے میں بتایا گیا جو اس چیمپیئنز ٹرافی میں حصہ لینے والی ٹیموں کے لیے کیے جائیں گے۔

اجلاس کو بتایا گیا کہ پاکستان کے قانون نافذ کرنے والے اداراے اور انٹیلیجنس ایجنسیاں ملکر کام کر رہی ہیں اور ان اداروں کے اہلکاروں نے ہی سکیورٹی کے انتظامات کیے ہیں۔

مجوزہ شیڈول کے مطابق چیمپئنز ٹرافی کرکٹ ٹورنامنٹ کا افتتاحی میچ گیارہ ستمبر کو کھیلا جانا ہے۔

واضح رہے کہ اس برس کے اوائل میں آسٹریلوی کرکٹ ٹیم نے سکیورٹی کے بارے میں خدشات کے سبب پاکستان آنے سے انکار کیا تھاجس کے بعد سے دنیا کی دوسری ٹیمیں بھی پاکستان میں کھیلنے کے حوالے سے تحفظات کا اظہار کر رہی ہیں۔

نیوزی لینڈ کرکٹ بورڈ نے ابھی تک اس ٹورنامنٹ میں حصہ لینے یا نہ لینے کے بارے میں پاکستانی کرکٹ بورڈ کو آگاہ نہیں کیا ہے۔

پاکستان میں دہشت گردی کے واقعات کی وجہ سے یہ خطرہ پیدا ہوگیا تھا کہ چیمپیئنز ٹرافی کا انعقاد کسی دوسرے ملک میں کیا جائے گا تاہم گزشتہ ماہ انٹرنیشنل کرکٹ کونسل کے اجلاس میں یہ فیصلہ کیا گیا تھا کہ کرکٹ کے یہ مقابلے پاکستان میں ہی ہوں گے۔

اجلاس میں حال ہی میں پاکستان میں ہونے والے ایشیا کپ کرکٹ ٹورنامنٹ میں شریک ٹیموں کے لیے کیے جانے والے حفاظتی اقدامات کو بھی زیر بحث لایا گیا۔ واضح رہے کہ سکیورٹی کے ماہرین نے پاکستان کا دورہ کیا تھا اور انہوں نے یہاں پر سکیورٹی کے بارے میں ایک رپورٹ آئی سی سی کو دی تھی۔

واضح رہے کہ اس برس کے اوائل میں آسٹریلوی کرکٹ ٹیم نے سکیورٹی کے بارے میں خدشات کے سبب پاکستان آنے سے انکار کیا تھاجس کے بعد سے دنیا کی دوسری ٹیمیں بھی پاکستان میں کھیلنے کے حوالے سے تحفظات کا اظہار کر رہی ہیں۔