شہزاد ملک بی بی سی اردو ڈاٹ کام، اسلام آباد

	یورپ اور امریکہ میں اولمپکس مشعل کی آمد پر احتجاجی مظاہرے ہوئے

اولمپکس مشعل منگل اور بدھ کی درمیانی شب اسلام آباد پہنچے گی جبکہ مشعل برداری کی تقریب بدھ کے روز منعقد ہوگی، جس میں صدر جنرل (ریٹائرڈ) پرویز مشرف اور وزیر اعظم سید یوسف رضا گیلانی کی شرکت متوقع ہے۔

انتظامات کا جائزہ لینے کے لیے وزارت داخلہ میں ایک خصوصی سیل قائم کیا گیا ہے اور سکیورٹی انتظامات کو حتمی شکل دینے کے لیے منگل کو ایک اہم اجلاس منعقد ہوا۔

سٹی پولیس افسر راولپنڈی سید سعود عزیز نے بی بی سی کو بتایا کہ بیجنگ اولمپکس مشعل برداروں کی سکیورٹی کو وہی درجہ دیا گیا ہے جو صدر، وزیر اعظم یا کسی ملک کے سربراہ کی پاکستان آمد کے موقع پر دیا جاتا ہے۔

انہوں نے کہا کہ اسلام آباد ائرپورٹ پر، جو راولپنڈی کی حدود میں واقع ہے، ان مشعل برداروں کی آمد کےموقع پر سات سو سے زائد پولیس اہلکاروں کو تعینات کیا جائے گا۔ اس کے علاوہ ان کی آمد سے پہلے شہر بھر میں سکیورٹی انتہائی سخت کردی گئی ہے۔

نو گو ایریا  اسلام آباد کی انتظامیہ نے لیاقت جمنیزیم کو، جہاں پر بیجنگ اولمپکس مشعل کی استقبالیہ تقریب منعقد ہونا ہے، لوگوں کے لیے ’نوگو‘ ایریا قرار دیا ہے

ادھر اسلام آباد کی انتظامیہ نے لیاقت جمنیزیم کو، جہاں پر بیجنگ اولمپکس مشعل کی استقبالیہ تقریب منعقد ہونا ہے، لوگوں کے لیے ’نوگو‘ ایریا قرار دیا ہے۔

اسلام آباد کی انتظامیہ نے لیاقت جمنیزیم اور اس کے قرب و جوار اور شہر کے مختلف علاقوں میں بارہ سو کے قریب پولیس اہلکار تعینات کیے ہیں۔اس کے علاوہ شہر کی مارکیٹوں اور پبلک مقامات پر بھی سکیورٹی بڑھا دی گئی ہے۔

انٹیلیجنس ایجنسیوں کے اہلکاروں کو ہدایت کی گئی ہے کہ وہ راولپنڈی اور اسلام آباد میں واقع مساجد اور مدرسوں میں زیر تعلیم طلباء کی نقل و حرکت پر نظر رکھیں تاکہ کوئی ناخوشگوار واقعہ پیش نہ آئے۔

واضح رہے کہ پہلے یہ طے پایا تھا کہ بیجنگ اولمپکس مشعل بردار تین کلومیٹر کا فاصلہ طے کر کے لیاقت جمنیزیم پہنچیں گے، جہاں پر تقریب منعقد ہونا تھی تاہم سیکورٹی خدشات کے پیش نظر یہ تقریب اب صرف لیاقت جمنیزیم میں ہوگی اور اس میں وہی لوگ شریک ہوں گے جنہیں پاکستان اولمپکس ایسوسی ایشن نے کارڈ جاری کیے گئے ہیں۔