عبدالرشید شکور بی بی سی اردو ڈاٹ کام، کراچی

	شعیب اختر نے ایک انٹرویو میں انکشاف کیا ہے کہ انہیں جنوبی افریقہ اور بھارت میں میچ فکسنگ مافیا نے بھاری رقوم کی پیشکش کی تھی

شعیب اختر نے گزشتہ دنوں ڈسپلن کی خلاف ورزی پر پانچ سالہ پابندی عائد کیے جانے کے بعد شدید ردعمل ظاہرکرتے ہوئے ٹی وی پر ایک انٹرویومیں کہا تھا کہ انہیں مبینہ طور پر2003 میں جنوبی افریقہ کے دورے کے دوران اور بھارت میں میچ فکسنگ مافیا نے بھاری رقم کی پیشکش کی تھی جسے انہوں نے ٹھکرا دیا تھا۔

پاکستانی ذرائع ابلاغ کا کہنا ہے کہ آئی سی سی کے اینٹی کرپشن اینڈ سکیورٹی یونٹ کے افسر ایلن پیکاک نے پاکستان آ کر شعیب اختر سے پوچھ گچھ کی ہے تاہم ان کی آمد اور تحقیقاتی عمل کو اینٹی کرپشن یونٹ کی پالیسی کے مطابق انتہائی خفیہ رکھا گیا ہے۔

اینٹی کرپشن یونٹ کے تحقیقاتی افسر نے شعیب اختر کے اس انکشاف کی روشنی میں یونس خان اور عمرگل سے بھی بات کی ہے۔ یونس خان بھارت کے دورے میں نائب کپتان تھے اور شعیب ملک کے ان فٹ ہوجانے کے بعد انہوں
نےدو ٹیسٹ میچوں میں کپتانی بھی کی تھی۔

واضح رہے کہ آئی سی سی کے ضابطۂ اخلاق کے مطابق اگر کوئی کرکٹر میچ فکسنگ کے بارے میں اسے کی جانے والی پیشکش سے اپنے کرکٹ بورڈ یا آئی سی سی کو بروقت مطلع نہیں کرتا تو اسے ایک سے پانچ سال کی پابندی کا سامنا ہوسکتا ہے۔

شعیب اختر سے اینٹی کرپشن یونٹ کی تحقیقات کا بنیادی مقصد یہی ہے کہ اگر انہیں اس قسم کی کوئی پیشکش کی گئی تھی تو وہ اتنا عرصہ خاموش کیوں رہے۔