مناء رانا بی بی سی اردو ڈاٹ کام، لاہور

	اس سیریز کو کروانے کا مقصد مالی فائدہ نہیں: پی سی بی

آسٹریلوی ٹیم کے پاکستان سیریز کھیلنے سے انکار کے بعد پاکستان کرکٹ بورڈ نے کئی ممالک سے رابطہ کیا جن میں بھارت اور سری لنکا بھی شامل تھے لیکن صرف بنگلہ دیش کی ٹیم نے دو طرفہ بنیاد پر آنے کی حامی بھری۔

پاکستان کرکٹ بورڈ کے چیف آپریٹنگ آفیسر شفقت نغمی نے تسلیم کیا کہ بنگلہ دیش کے خلاف سیریز سے مالی فائدہ ہونے کے بجائے نقصان ہونے کا امکان تو ہے لیکن اس سیریز کو کروانے کا مقصد مالی فائدہ نہیں۔

انہوں نے کہا کہ آسٹریلیا کے انکار کے بعد کسی بھی ٹیم کو بلوانا بہت ضروری تھا اور ہمارے پیش نظر مالی فائدے سے زیادہ کرکٹ کے کھیل کا فائدہ ہے۔

انہوں نے بتایا کہ اس سیریز کے بدلے میں پاکستان کی ٹیم اتنے ہی ون ڈے اور ٹونٹی ٹونٹی میچز بنگلہ دیش میں کھیلے گی اور اس سے یہ فائدہ ہو گا کہ پاکستان کرکٹ بورڈ کو سوا آٹھ لاکھ ڈالر کی خطیر رقم بنگلہ دیشی ٹیم کو نہیں دینی پڑے گی۔

شفقت نغمی نے کہا کہ ابھی مکمل تخمینہ تو نہیں لگایا گیا تاہم یہ درست ہے کہ اس سیریز سے مالی خسارہ ہو سکتا ہے لیکن یہ سنہ دو ہزار چار میں بنگلہ دیش کی ٹیم کی پاکستان میں سیریز میں ہونے والے نقصان سے کم ہو گا۔

انہوں نے زور دیا کہ یہ سیریز کروانا اس لیے بھی ضروری ہے کہ اس سیریز کو احسن طریقے سے کروانے کے بعد ایشیا کپ اور اس کے بعد چمپئنز ٹرافی کے لیے راستے ہموار ہو جائیں گے۔

یہ سیریز کروانا اس لیے بھی ضروری ہے کہ اس سیریز کو احسن طریقے سے کروانے کے بعد ایشیا کپ اور اس کے بعد چمپئنز ٹرافی کے لیے راستے ہموار ہو جائیں گے۔ پی سی بی

جبکہ اب تک پی سی بی نےاس سیریز کے ٹی وی رائٹس محض ایک کروڑ اور سینتالیس لاکھ میں فروخت کیے ہیں جبکہ بقیہ رقم ٹائٹل سپونسر شپ اور سٹیڈیمز کے اندر بل بورڈز وغیرہ سے حاصل کی جائے گی۔

لیکن اس رقم کے مناسب ہونے کا امکان کافی معدوم ہے جس کی وجہ یہ ہے کہ بنگلہ دیش کے خلاف سیریز کی اہمیت بہت کم ہے اور اس کا موازنہ آسٹریلیا جیسی بڑی ٹیم کے ساتھ سیریز سے تو بالکل نہیں کیا جا سکتا۔