عبدالرشید شکور بی بی سی اردو ڈاٹ کام کراچی

	بنگلہ دیشی ٹیم کے دورے کی تفصیلات طے کی جا رہی ہیں

پاکستان کرکٹ بورڈ نے آسٹریلوی کرکٹ بورڈ کا فیصلہ آنے کے بعد بنگلہ دیشی کرکٹ بورڈ سے رابطہ کیا تھا جس نے پاکستان کرکٹ بورڈ کی دعوت قبول کرتے ہوئے اپنی ٹیم کو پاکستان بھیجنے کا فیصلہ کیا ہے۔

بنگلہ دیشی کرکٹ ٹیم پاکستان میں پانچ ایک روزہ انٹرنیشنل اور ایک ٹوئنٹی ٹوئنٹی میچ کھیلے گی۔ دورے کی تاریخوں کا اعلان جلد کیا جائے گا۔

بنگلہ دیشی ٹیم اسوقت جنوبی افریقہ کے خلاف ون ڈے سیریز میں مصروف ہے جو چودہ مارچ کو ختم ہوگی۔

پاکستان کرکٹ بورڈ نے آسٹریلوی انکار کو ذہن میں رکھتے ہوئے متعدد متبادل پروگراموں پر کام شروع کررکھا تھا جن میں سے بنگلہ دیش کے خلاف ون ڈے سیریز کو حتمی شکل دے دی گئی ہے۔

آسٹریلیا کی طرف سے پاکستانی دورے کو مؤخر کرنے کے بعد پاکستان کرکٹ بورڈ نے بھارت سے بھی رابطہ کرکے تین ایک روزہ بین الاقوامی میچوں کے انعقاد کی کوشش کی تھی لیکن بھارتی کرکٹ بورڈ نے اپنے کھلاڑیوں کی تھکاوٹ کو بنیاد بناکر یہ تجویز مسترد کردی تھی۔
پاکستان کو اس سال جون میں ایشیا کپ اور ستمبر میں آئی سی سی چیمپئنز ٹرافی کی میزبانی بھی کرنی ہے۔ آسٹریلوی ٹیم کے پاکستان نہ آنے کے سبب دونوں ایونٹس خصوصاً آئی سی سی چیمپئنز ٹرافی کا انعقاد خطرے میں دکھائی دینے لگا ہے لیکن پاکستان کرکٹ بورڈ کے چیئرمین ڈاکٹر نسیم اشرف کو یقین ہے کہ پاکستان دونوں مقابلے منعقد کرنے میں کامیاب ہوجائے گا۔
بھارت اور سری لنکا نے ایشیا کپ کے انعقاد کے ضمن میں پاکستان کرکٹ بورڈ کو اپنے تعاون کی یقین دہانی کرائی ہے۔