مناء رانا بی بی اردو ڈاٹ کام، لاہور

	سلیکشن کمیٹی کے سربراہ اصلاح الدین نے ٹیم کو متوازن قرار دیا ہے اور کہا ہے کہ دستیاب کھلاڑیوں میں سے بہتری ٹیم چنی گئی ہے

اٹھارہ رکنی ٹیم میں ایک سال سے زائد عرصے تک ٹیم سے باہر رہنے والے سابق کپتان محمد ثقلین کے علاوہ چمپئنز ٹرافی میں ڈراپ کیے گئے ایک اور سابق کپتان فارورڈ ریحان بٹ کو بھی شامل کر لیا گیا ہے جبکہ اس سیریز کے لیے کپتانی کی ذمہ داری فل بیک ذیشان اشرف کو دی گئی ہے۔

ذیشان اشرف کو پہلی مرتبہ پاکستان کی ٹیم کی کپتانی دی گئی ہے اور چیف کوچ خواجہ ذکاء الدین کے مطابق اس وقت ٹیم میں ذیشان سب سے سینئر کھلاڑی ہیں اور اسی بنیاد پر انہیں کپتان بنایا گیا ہے جبکہ ثقلین کافی عرصے کے بعد ٹیم میں آئے ہیں اس لیے ان کا نام کپتان کے لیے نہیں ہو سکتا۔ ان کا کہنا تھا کہ کپتان کی تعیناتی فیڈریشن کے صدر کی صوابدید پر ہوتی ہے۔

ذیشان اشرف کا کہنا ہے کہ پاکستان کی ٹیم کی کپتانی ملنا ان کے لیے ایک اعزاز ہے اور وہ اسے ایک چیلنج بھی سمجھتے ہیں۔ انہوں نے کہا کہ سینئر کھلاڑیوں ثقلین اور ریحان کے ٹیم میں شامل ہونے سے ٹیم کو فائدہ ہو گا اور وہ بحثیت کپتان بھی ان کے تجربے سے فائدہ حاصل کریں گے۔ ذیشان اشرف کے بقول ٹیم کا اصل ہدف تو المپک کی تیاری ہے۔

چمپئنز ٹرافی میں ڈراپ کیے جانے والے فارورڈ ریحان بٹ نے ٹرائلز میں زبردست کارکردگی دکھائی جو ان کی ٹیم میں دوبارہ واپسی کا سبب بنی۔ ریحان بٹ کا کہنا ہے کہ نا صرف ان کی بلکہ ثقلین کی ٹیم میں شمولیت سے ٹیم کی کارکردگی بہتر ہو گی اور چین میں ہونے والی یہ سیریز المپک کے لیے ہماری تیاریوں کا حصہ ہے اس لیے یہ ایک اہم ٹورنامنٹ ہے اوراس میں اگر ٹیم کا کمبی نیشن بہتر ہوا تو یہ المپک کے لیے بہت فائدہ دے گا۔

	شکیل عباسی پاکستان کی فارورڈ لائن کے اہم رکن ہوں گے

سلیکشن کمیٹی کے سربراہ اصلاح الدین نے ٹیم کو متوازن قرار دیا اور کہا کہ دستیاب کھلاڑیوں میں سے بہتری ٹیم چنی گئی ہے ٹیم نوجوان اور تجربہ کار کھلاڑیوں کا اچھا امتزاج ہے۔

اصلاح الدین کے بقول ٹیم کے انتخاب میں فزیکل فٹ نس کو مد نظر رکھا گیا ہے ٹیم کی فزیکل فٹ نس میں بہتری ہوئی ہے تاہم اسے مزید بہتر کرنے کی ضرورت ہے۔ انہوں نے امید ظاہر کی کہ ٹیم چین کے خلاف سیریز جیتنے کی اہلیت رکھتی ہے۔

ٹیم کا اعلان اٹھائیس اور انتیس فروری کو لاہور میں منعقدہ دو روزہ ٹرائلز کے خاتمے پر سلیکشن کمیٹی کے چئرمین المپئن اصلاح الدین نے کرنا تھا لیکن پاکستان ہاکی فیڈریشن کے صدر میر ظفر اللہ جمالی گھٹنوں کے آپریشن کے سبب کراچی میں تھے اور منتخب کھلاڑیوں کے نام ان کی منظوری کے لیے بھجوائے گئے اور انہوں نے اگلے روز ان ناموں پر اپنی منظوری کی مہر ثبت کی لہذا ٹیم کا اعلان یکم مارچ کو کیا گیا۔

ٹیم ان کھلاڑیوں پر مشتمل ہو گی:

گول کیپر: سلمان اکبر، ناصر علی۔

فل بیکس: ذیشان اشرف، محمد عتیق، کامران احمد

ہاف بیکس: محمد عرفان، محمد ثقلین، فرید احمد، وقاص ظفر، محمد عمران،

فارورڈز: وقاص شریف، وقاص اکبر، ریحان بٹ، شکیل عباسی، محمد زبیر، عباس حیدر، شبیر خان اورشفقت رسول۔

اس کے علاوہ نو کھلاڑی سٹینڈ بائی رکھے گئے ہیں۔