برینڈن میکلم کی جارحانہ اننگز نے نیوزی لینڈ کو فتح کی راہ پر ڈال دیا

نیوزی لینڈ نے ٹاس جیت کر انگلینڈ کو پہلے کھیلنے کی دعوت دی لیکن انگلینڈ کی ٹیم مسلسل دباؤ کا شکار رہی جس دوران ڈینئل وٹوری نے اٹھائس رنز کے عوض دو وکٹیں حاصل کیں۔ انگلینڈ مقررہ پچاس اوورز میں دو سو بیالیس رنز نہ بنا پاتا اگر لُوک رائٹ اپنے سینتالیس رنز میں چار چھکے لگاتے اور ڈِمی میسکارنیس آخری اوور میں بائیس رنز نہ بناتے۔

میچ کا تفصیلی سکور کارڈ

انگلینڈ کے ریان سائڈباٹم نے مسلسل دو گیندوں پر دو کھلاڑی آؤٹ کیے لیکن میچ کے اختتام کا اعلان بہرحال بارش کے ہاتھ رہا۔

دونوں ٹیموں کے درمیان نیپیئر میں چوتھا میچ ایک دن میں سنسی خیز چھ سو اسی رنز کے بعد ’ٹائی‘ ہوگیا تھا۔ نیوزی لینڈ کو آخری گیند پر میچ اور سیریز جیتنے کے لیے دو رنز چاہیے تھے لیکن کپتان ڈینئل وٹوری صرف ایک رن بنا سکے تھے۔

چوتھے کے مقابلے میں پانچویں ایک روزہ میچ میں کئی اہم فرق سامنے آئے۔ نیوزی لینڈ نے اپنے سپن اٹیک میں تبدیلی کر کے قدرے زیادہ متوازن ٹیم میدان میں اتاری اور اس کے دونوں ابتدائی بلے بازوں نے انگلینڈ کے اس بہانے کو بالکل نہ چلنے دیا کہ کرائیسٹ چرچ کی پِچ پر بڑا سکور کرنا مشکل تھا۔ انگلینڈ کو سو رنز بنانے کے لیے پچیسویں اوور کا انتظار کرنا پڑا جبکہ نیوزی لینڈ گیارہویں ہی اوور میں سو رنز بنا چکا تھا۔

نیوزی لینڈ نے سینتیس اوورز میں چھ وکٹوں کے نقصان پر دو سو تیرہ رنز بنائے۔ اسے اگلے تیرہ اوورز میں صرف تیس رنز بنانا تھے لیکن خراب موسم کے باعث نیوزی لینڈ کےبلے بازوں کو دوبارہ میدان میں اترنے کی زحمت نہ کرنا پڑی اور رنز بنانے کی بہتر رفتار کے پیش نظر نیوزی لینڈ یہ میچ چار وکٹوں سے جیت گیا۔