عبدالرشید شکور بی بی سی اردو ڈاٹ کام، کراچی

	اصلاح الدین کو اب سلیکشن کمیٹی کا سربراہ بنا دیا گیا ہے

واضح رہے کہ اصلاح الدین کوگزشتہ سال یہ کہہ کر مینیجر وچیف کوچ بنایا گیا تھا کہ وہ بیجنگ اولمپکس تک یہ ذمہ داری نبھائیں گے لیکن گزشتہ ماہ چیمپئنز ٹرافی کے موقع پر ان کے زخمی ہو جانے پر خواجہ ذکاء الدین کو وقتی طور پر منیجر بناکر ملائیشیا بھیجا گیا تاہم اب ذکاء الدین کو مستقل بنیادوں پر منیجر اور چیف کوچ بنا دیا گیا ہے۔

پاکستان ہاکی فیڈریشن کے صدر میر ظفر اللہ جمالی نے بی بی سی سے بات کرتے ہوئے اس تاثر کو غلط قرار دیا کہ یہ فیصلہ دراصل اصلاح الدین پر عدم اعتماد ہے۔ انہوں نے کہا کہ’یہ فیصلہ بالکل ایسے ہی ہے جیسے گارڈز کی تبدیلی ہوتی ہے۔ اصلاح الدین اور ذکاء الدین دونوں ہاکی کے بڑے نام ہیں اور ان کی خدمات ہیں‘۔

	تمام سینئر کھلاڑیوں کی ہاکی میں بڑی ِخدمات ہیں:ظفر اللہ جمالی

میرظفراللہ جمالی نے کہا کہ یہ فیصلہ کرنے سے قبل انہوں نے اصلاح الدین کو اعتماد میں لے لیا تھا۔ انہوں نے کہا کہ ذکاء الدین نے اب ٹیم کو سنبھال لیا ہے لہذا بہتر یہی ہے کہ وہی یہ ذمہ داری سنبھالیں۔ میر ظفر اللہ جمالی نے کہا کہ تمام سینئر کھلاڑیوں کی ہاکی میں بڑی ِخدمات ہیں اور سب کا مقصد پاکستانی ہاکی کو کامیابی کی راہ پر ڈالنا ہے۔

پاکستان ہاکی فیڈریشن نے رشید جونیئر کے استعفے کے بعد خالی ہونے والی جگہ پر سابق اولمپئن مدثر اصغر کو سلیکشن کمیٹی میں شامل کر لیا ہے۔اس طرح اب سلیکشن کمیٹی اصلاح الدین، سمیع اللہ اور مدثر اصغر پر مشتمل ہوگی۔