کلارک نے ایک ہی اوور میں تین وکٹیں لے کر میچ کا پانسہ پلٹ دیا

جزوقتی سپنر مائیکل کلارک نے ایک اوور میں تین بھارتی بلے بازوں کو پویلین کی راہ دکھا کر آسٹریلیا کی فتح میں اہم کردار ادا کیا۔ یہ آسٹریلیا کی ٹیسٹ میچوں میں لگاتار سولہویں فتح تھی۔

میچ کا تفصیلی سکور کارڈ

اس سے قبل سٹیو وا کی قیادت میں انیس سو ننانوے سے دو ہزار ایک کے درمیانی عرصہ میں آسٹریلیا نے لگاتار سولہ ٹیسٹ میچوں میں کامیابی حاصل کی تھی۔

آسٹریلیا نے اپنی دوسری اننگز سات کھلاڑیوں کے نقصان پر چار سو ایک رنز بنا کر ڈکلیئر کرتے ہوئے بھارت کو جیت کے لیے تین سو تینتیس رنز کا ہدف دیا تھا۔ تاہم بھارت کی پوری ٹیم دو سو دس رنز بنا کر آؤٹ ہوگئی۔

بھارت کی دوسری اننگز میں گنگولی اکاون رنز بنائے جبکہ کپتان انیل کمبلے پینتالیس رنز بنا کر ناٹ آؤٹ رہے۔

چوتھے روز کے اختتام پر آسٹریلیا نے اپنی دوسری اننگز چار وکٹوں کے نقصان پر دو سو بیاسی رنز بنائے تھے۔ آسٹریلیا نے میچ کے آخری روز کھانے کے وقفے سے کچھ دیر قبل جب اپنی اننگز ڈکلیئر کی تو مائیکل ہسی ایک سو پینتالیس رنز پر ناٹ آؤٹ تھے۔