عبدالرشید شکور بی بی سی اردو ڈاٹ کام، کراچی

	پہلا میچ دیکھنے کے لیے شائقین واہگہ کے راستے بھارت جائیں گے

پاک بھارت کرکٹ سیریز کی ویزا پالیسی بدھ کو جاری کی گئی ہے جس کے مطابق بھارتی کرکٹ بورڈ نے ہر ون ڈے کے لیے صرف دو سو پچاس ٹکٹ مختص کیے ہیں۔

پہلے مرحلے میں موہالی ون ڈے کے ٹکٹ جاری کیے گئے ہیں۔ یہ میچ دیکھنے کے لیے شائقین واہگہ کے راستے بھارت جائیں گے جبکہ دیگر میچوں کے لیے دلی کا ہوائی سفر کرنا ہوگا اور واپسی بھی وہیں سے ہوگی۔

صرف انہی پاکستانی شائقین کو ویزے جاری کیے جائیں گے جن کے پاس میچ ٹکٹ اور ہوٹل کی بکنگ ہوگی۔ پاکستان کرکٹ بورڈ کے ڈائریکٹر کرکٹ آپریشنز ذاکر خان نے بی بی سی کو بتایا کہ بھارتی کرکٹ بورڈ سے چھ تا سات ہزار ٹکٹوں کی درخواست کی گئی تھی کیونکہ پاک بھارت کرکٹ میچز میں شائقین کی دلچسپی اپنے عروج پر ہوتی ہے۔

انہوں نے کہا کہ اس مرتبہ بھی شائقین کی بہت بڑی تعداد نے موہالی، دہلی، جے پور اور گوالیار کے میچز دیکھنے کی خواہش ظاہر کی ہے۔انہوں نے کہا کہ بھارتی کرکٹ بورڈ سے ٹکٹوں کی تعداد میں اضافے کی بات کی جائے گی۔

پاکستانی کرکٹ ٹیم پہلی نومبر کو بھارت کے بیالیس روزہ دورے پر نئی دلی پہنچ رہی ہے۔ اس دوران پہلے وہ پانچ ایک روزہ میچ کھیلے گی اور پھر تین ٹیسٹ میچ ہوں گے۔ پہلا ون ڈے میچ پانچ نومبر کوگوہاٹی میں کھیلا جائےگا اور دوسرا آٹھ نومبر کو موہالی میں جبکہ باقی تین میچ بالترتیب کانپور،گوالیار اور جے پور میں ہوں گے۔

ٹیسٹ میچ دلی، کولکتہ اور بنگلور میں کھیلے جائیں گے۔گوہاٹی روانہ ہونے سے قبل پاکستانی ٹیم دو نومبر کو فیروز شاہ کوٹلہ گراؤنڈ پر دلی کرکٹ ٹیم کے ساتھ ایک وارم اپ میچ کھیلےگی۔