صلاح الدین بی بی سی اردو ڈاٹ کام، دلی

	ڈراوڈ کو جگہ بنانے کے لیے کار کردگی کا مظاہرہ کرنا ہوگا: وینگسارکر

احمد آباد میں سلیکشن کمیٹی کے چیئرمین دلیپ وینگسارکر نے ٹیم کا اعلان کرتے ہوئے بتایا کہ حالیہ ون ڈے میچوں میں راہل ڈراوڈ کی کار کردگی کو مدِ نظر رکھتے ہوئے انہیں آرام دیا گیا ہے۔

آسٹریلیا کے خلاف سات ایک روزہ میچوں کی حالیہ سیریز میں راہول ڈراوڈ کی کار کردگی اچھی نہیں رہی تھی اور اس لیے آخری میچ میں بھی انہیں ٹیم میں شامل نہیں کیا گیا تھا۔

کرکٹ بورڈ نے پہلے دو میچوں کے لیے کافی دنوں سے ٹیم سے باہر رہنے والے بلے باز وریندر سہواگ کو ٹیم میں شامل کیا ہے۔

سلیکشن کمیٹی کے چیئرمین دلیپ وینگسارکر نے بی بی سی سے بات کرتے ہوئے کہا کہ ’راہول ایک عظیم کھلاڑی ہیں، ہم انہیں تھوڑا آرام کرنے دینا چاہتے ہیں۔ ہمیں امید ہے کہ وہ بہت جلد واپس ہوں گے، دیکھیے انہیں اپنی جگہ بنانے کے لیے کار کردگی اور فٹنس کا بھی مظاہرہ کرنا ہوگا‘۔

وینگسارکر نے کہا کہ انٹرنیشنل کرکٹ میں راہول کا زبردست ریکارڈ ہے اور انہیں پورا یقین ہے وہ جلدی ہی واپسی کریں گے۔

	وریندر سہواگ ٹیم میں دوبارہ جگہ بنانے میں کامیاب رہے ہیں

ٹیم کا اعلان کرتے ہوئے انہوں نے کہا کہ ریاست اتر پردیش کے نوجوان تیز گیند باز پروین کمار کو ٹیم میں پہلی بار جگہ دی گئی ہے۔

بھارت اور پاکستان کے درمیان پانچ ایک روزہ اور تین ٹیسٹ میچوں کی سیریز کھیلی جائےگی۔ ون ڈے سیریز کا پہلا ایک روزہ میچ پانچ نومبر کوگوہاٹی میں ہوگا جبکہ دوسرا ون ڈے میچ آٹھ نومبر کو موہالی میں کھیلا جائےگا۔

پہلے ون ڈے کے لیے بھارتی ٹیم: مہندر سنگھ دھونی ( کپتان)، سچن تندولکر، وریندر سہواگ، سورو گنگولی، یواراج سنگھ، گوتم گمبھیر، عرفان پٹھان، روہت شرما، سریسانتھ، آر پی سنگھ، مرلی کارتک،پروین کمار، ظہیر خان اور ہربھجن سنگھ۔