مناء رانا بی بی سی اردو ڈاٹ کام، لاہور

	ٹیسٹ میچوں کھیلنے والی ٹیم میں چار تبدیلیاں کی گئی ہیں

ٹیسٹ ٹیم میں شامل کھلاڑیوں میں سے ایک روزہ میچوں کے لیے چار تبدیلیاں کیں گئیں ہیں جن کے تحت شاہد آفریدی، عمران نذیر، یاسر حمید اور فاسٹ بالر سہیل تنویر کو ٹیم میں شامل کیا گیا ہے۔

چیف سلیکٹر صلاح الدین صلو نے کہا کہ محمد آصف کو ایک ہفتے کے آرام کا مشورہ دیا گیا ہے لہذا ان کے ٹیم میں شامل ہونے کا فیصلہ سترہ اکتوبرکو کیا جائے گا لیکن ان کے علاوہ تین فاسٹ بالر عمر گل، راؤ افتخار اور سہیل تنویر کو شامل کیا گیا ہے۔

انہوں نے کہا کہ چار میچ نہ کھیلنے کی پابندی پوری ہونے کے بعد اگر شعیب اختر نے اپنی فِٹنس ثابت کی تو انہیں پانچویں میچ کے لیے مد نظر رکھا جائےگا۔’وہ اتنا بڑا کھلاڑی ہے کہ اس کی ٹیم میں شمولیت سے ٹیم مزید مضبوط ہو جائے گی۔‘

سہیل تنویر کو یاسرعرفات پر ترجیح دینے کے فیصلے کی بابت صلاح الدین صلو کا کہنا تھا کہ سہیل تنویر کو ایک آل راؤنڈر کے طور پر رکھا گیا ہے۔

انہوں نے کہا کہ عبدالرزاق ایک اچھا آل راؤنڈر ہے لیکن انہیں چاہیے کہ اپنی فارم اور فٹ نس ثابت کرنے کے لیے فرسٹ کلاس کرکٹ کھیلیں۔

انہوں نے کہا کہ لاہور اور کراچی میں ٹیم کا انحصار سپن بالروں پر ہو گا۔ انہوں نے کہا کہ شعیب ملک پانچویں بالر تھے لیکن نہ جانے انہوں نے بالنگ کیوں نہیں کروائی۔

انہوں نے کہا کہ کامران اکمل کو اوپنگ کروانے کا فیصلہ ٹیم مینجمنٹ کا تھا اور سلیکشن کمیٹی ان معاملات میں دخل نہیں دیتی۔

پاکستان ٹیم: سلمان بٹ،کامران اکمل،یونس خان،،محمد یوسف،مصباح الحق،شعیب ملک،عبدالرحمن،عمر گل،محمد آصف،عمران نذیر،شاہد آفریدی،یاسر حمید،راؤ افتخار،سہیل تنویر محمد حفیظ۔