مناء رانا بی بی سی اردو ڈاٹ کام، لاہور

	جب انضمام الحق بیٹنگ کرنے آئے تو تماشائیوں اور جنوبی افریقہ کے کھلاڑیوں نے تالیاں بجا کر استقبال کیا

تفصیلی سکور کارڈ

دوسرا دن، پاکستان 140 پر چار آؤٹ

تیسرے دن کا کھیل پاکستان کی ٹیم کے لیے تباہ کن ثابت ہوا اور پاکستان کی ٹیم لنچ کے فورا بعد206 رنز بنا کر آؤٹ ہوگئی۔

بدھ کی صبح جب میچ شروع ہوا تو انضمام الحق، جن سے ایک بڑے سکور کی توقع کی جا رہی تھی مایوس کن کارکردگی دکھاتے ہوئے صرف چودہ رنز بنا کر آؤٹ ہوئے۔ وہ جیک کیلس کی باہر جاتی ہوئی گیند کو کھیلنے کی کوشش کرتے ہوئے وکٹ کیپر مارک باؤچر کے ہاتھوں کیچ آؤٹ ہوئے۔

ان کی وکٹ پر موجودگی کے سبب پاکستان کو ایک لمبے سکور کی امید تھی جو دم توڑ گئی۔ انضمام الحق ٹیسٹ کرکٹ میں پاکستان کے سب سے زیادہ رنز بنانے کا جاوید میاں داد کا ریکارڈ توڑنے میں بھی ناکام رہے۔ انضمام الحق کی وکٹ اس وقت گری جب پاکستان کے کل کے سکور 140 میں صرف نو رنز کا اضافہ ہوا تھا۔

انضمام ریکارڈ نہ بناسکے  انضمام الحق ٹیسٹ کرکٹ میں پاکستان کے سب سے زیادہ رنز بنانے کا جاوید میاں داد کا ریکارڈ توڑنے میں بھی ناکام رہے۔ انضمام الحق کی وکٹ اس وقت گری جب پاکستان کے کل کے سکور 140 میں صرف نو رنز کا اضافہ ہوا تھا۔

پاکستان کی مشکلات میں بے حد اضافہ اس وقت ہوا جب مصباح الحق جو کہ کافی سیٹ ہو چکے تھے ایک غیر ذمہ دارانہ شارٹ کھیلتے ہوئے باؤچر کے ہاتھوں مکھایا نتینی کے گیند پر آؤٹ ہو گئے۔ اس وقت پاکستان کا سکور 189 تھا۔

مکھایا نے اپنی اگلی بال پر عمر گل کو ایل بی ڈبلیو آؤٹ کر دیا اور ہیٹ ٹرک کے قریب پہنچ گئے لیکن وہ ہیٹ ٹرک تو نہ بنا سکے البتہ انہوں نے 189 رنز پر ہی اگلے بیٹس مین دنیش کنیریا کوبھی آؤٹ کر دیا۔ ان کا کیچ بھی وکٹ کیپر مارک باؤچر نے لیا۔

دنیش کوئی رن نہ بنا سکے۔ لنچ کے وقفے پر پاکستان کی نو وکٹیں گر چکی تھیں۔ دنیش کے بعد محمد آصف کھیلنے کے لیے آئے۔

محمد آصف نے عبدالرحمن کا کچھ دیر ساتھ دیا لیکن وہ بھی لنچ کے بعد پہلے اوور کی آخری گیند پر آملہ کے ہاتھوں پال ہیرس کی گیند پر کیچ آؤٹ ہوئے اور یوں پاکستان کی پوری ٹیم 63 اوورز میں 287 منٹ وکٹ پر گزار کر 206 رنز بنا کر پیولین لوٹ گئی۔

جنوبی افریقہ کی جانب سے مکھایا نتینی نے تین، ہیرس نے تین، سٹین نے دو اور نیل اور کیلس نے ایک ایک وکٹ لی۔

جنوبی افریقہ کی دوسری اننگز کا آغاز بھی حسب معمول گریم سمتھ اور ہرشل گبز نے کیا۔ ان کی پہلی وکٹ 34 کے سکور پر گری جب گبز سولہ رنز بنا کر عمر گل کی گیند پر کامران اکمل کے ہاتھوں کیچ آؤٹ ہوئے۔

جنوبی افریقہ کی دوسری وکٹ چائے کے وقفے سے کچھ لمحے پہلے چھیاسٹھ رنز پر گری۔ہاشم آملہ سترہ رنز پر کھیل رہے تھے کہ عبدالرحمن نے انہیں بولڈ کر دیا۔
اس کے بعد پاکستانی بالرز کسی مزید کھلاڑی کوآؤٹ کرنے میں ناکام رہے۔

پاکستان ٹیم
سلمان بٹ، کامران اکمل، یونس خان، انضمام الحق، محمد یوسف، مصباح الحق، شعیب ملک، عبدالرحمن، عمر گل، محمد آصف، دنیش کنیریا، فیصل اقبال(بارہویں کھلاڑی)

جنوبی افریقن ٹیم
گریم سمتھ، ہرشل گبز، اے بی ڈولیئر، ژاک کیلس، ایش ویل پرنس،ہاشم آملہ، مارک باؤچر، اینڈرے نیل، پال ہیرس، مکایا نتنی، ڈیل شٹین، پال ڈومنی(بارہویں کھلاڑی)