جنوبی افریقہ کے ڈیل سٹیون پاکستان کے کپتان شعیب ملک کو آؤٹ کرنے کی خوشی منا رہے ہیں

انہوں نے کہا کہ ٹیم کافی دیر بعد ٹیسٹ سیریز کھیل رہی ہے اور ’ہماری ٹیم ابھی ٹوئنٹی ٹوئنٹی ٹورنامنٹ کھیل کر آئی ہے اس سے پہلے ہم ون ڈے کھیلتے رہے اور کافی عرصے سے ٹیسٹ کرکٹ سے دور ہیں۔‘

انہوں نے کہا کہ ٹیم کے دو بیٹسمینوں محمد یوسف اور انضمام نے کافی دیر کے بعد کرکٹ کھیلی ہے اس لیے ٹیم اچھا کھیل نہ کھیل سکی۔

سلمان بٹ نے کہا کہ محمد آصف ان فٹ ہو گئے ہیں اور انکی غیر موجودگی میں پاکستان کی ٹیم کو ایک اور فاسٹ بالر کی کمی محسوس ہو گی۔

انہوں نے کہا کہ ٹیم کی مجموعی کارکردگی اطمینان بخش نہیں ہے کیونکہ بالرز نے 259 پر چھ کھلاڑی آؤٹ کرنے کے بعد جنوبی افریقہ کو ایک لمبا سکور کرنے دیا اور سپنرز بھی توقعات کے مطابق وکٹیں حاصل نہیں کر سکے۔

انہوں نے کہا کہ ’سیریز میں ان کی ٹیم کے خلاف کچھ بد قسمت فیصلے بھی ہوئے جیسے کہ کراچی میں ان کا کیچ آؤٹ اور لاہور میں محمد یوسف کا ایل بی ڈبلیو ’ہمارے لیے درست فیصلے نہیں تھے جس کا یقیناً اثر پڑا ہے۔‘

انہوں نے پہلی اننگز میں اپنے اور کامران کے تیز بیٹنگ کرنے کا دفاع کرتے ہوئے کہا کہ 357 رنز کا ہدف پورا کر کے مزید سکور کرنے کے لیے ضروری تھا کہ ہم تیز رنز بنائیں تا کہ سیریز برابر کر سکیں اور ’ہم نے 90 رنز کا اچھا سٹارٹ بھی دیا لیکن بعد میں آنے والے بیٹسمین اس کا فائدہ نہیں اٹھا سکے۔‘

سلمان بٹ نے کہا کہ ہم ابھی بھی کوشش کریں گے کہ میچ میں واپس آ جائیں۔

جنوبی افریقہ کے بالر پال ہیرس جنہوں نے تین پاکستانی کھلاڑیوں کو نشانہ بنایا اپنی بالنگ پر خوش اور مطمئن تھے ان کا کہنا تھا کہ ان کی ٹیم کی پوزیشن بہت مضبوط ہے اور پاکستان کی ٹیم کے لیےاس وکٹ پر بڑا ہدف پورا کرنا ایک کٹھن کام ہو گا۔

جنوبی افریقہ کی مجموعی برتری 305 رنز ہے اور اس کے آٹھ کھلاڑی ابھی باقی ہیں۔ اس موقع پر پاکستان کی ٹیم کے فاسٹ بالر محمد آصف کی کہنی میں تکلیف پھر شروع ہو گئی ہے اور جمعرات کو صبح ڈاکٹر یہ فیصلہ کریں گے کہ وہ بالنگ کر سکتے ہیں یا نہیں۔

ادھر پاکستان کرکٹ بورڈ کی ڈسپلنری کمیٹی کل شعیب اختر کی ڈسپلن کی خلاف ورزیوں پر اپنا فیصلہ سنائے گی۔ مبصرین کے خیال میں پاکستان کی ٹیم کے بالنگ کے شعبے میں موجودہ حالات کے سبب ڈسپلنری کمیٹی کا شعیب اختر کے لیے نرم رویہ ہو گا اور شعیب اختر کو زیادہ سے زیادہ جرمانے کی سزا کا امکان ہے۔