عبدالرشید شکور بی بی سی اردو ڈاٹ کام، جوہانسبرگ

	’قسمت بھی اسی کا ساتھ دیتی ہے جو محنت کرے‘

چار سال قبل اسی وانڈررز میں بھارتی ٹیم ورلڈ کپ کا فائنل ہاری تھی لیکن پیر کو ٹوئنٹی ٹوئنٹی کپ کے فائنل کے بعد جب کپتان کی حیثیت سے دھونی میڈیا کانفرنس میں آئے تو چمکتی ٹرافی کے ساتھ ان کے چہرے پر اطمینان اور خوشی کو باآسانی پڑھا جاسکتا تھا۔

دھونی بھارتی ٹیم کی اس شاندار جیت کا بحیثیت کپتان کریڈٹ لینے کے لیے تیار نہیں اور وہ مسکراتے ہوئے کہنے لگے کہ یہ ٹیم ورک اور کھلاڑیوں کی خود اعتمادی کا نتیجہ ہے۔

اس سوال پر کہ اس جیت میں قسمت کا کتنا دخل ہے؟ دھونی نے کہا کہ قسمت بھی اسی وقت ساتھ دیتی ہے جب آپ محنت کریں لیکن یہ کپ صرف ان کی قسمت میں نہیں بلکہ ان کی ٹیم کے ہر کرکٹر کی قسمت میں لکھا تھا۔

بیٹنگ سے زیادہ بولنگ اچھی رہی  بولنگ بیٹنگ سے زیادہ مستقل مزاج رہی۔ بیٹنگ میں چند ایک اچھی اننگز دیکھنے میں آئیں لیکن بولنگ نے پورے ٹورنامنٹ میں اپنا اثر قائم رکھا مہندر سنگھ دھونی

دھونی نے کہا کہ انگلینڈ کے طویل دورے کے بعد یہ ٹورنامنٹ آسان نہیں تھا لیکن ٹیم نے اپنے اوپر ٹریننگ اور میچوں کا پریشر نہیں لیا اور ہر چیز کو معمول کے مطابق نمٹایا۔

فائنل کے بارے میں بھارتی کپتان کا کہنا تھا کہ انہیں اپنے بولرز کی صلاحیتوں پر مکمل اعتماد تھا آر پی سنگھ اور عرفان پٹھان نے بڑی عمدہ بولنگ کی ہربھجن نے بھی ایک اوور کے سوا اچھی گیندیں کیں۔ جوگندر شرما نے آخری اوور بہت عمدگی سے کیا۔ جوں جوں میچ اختتامی لمحات کی طرف بڑھ رہا تھا انہیں اندازہ تھا کہ پاکستان کے پاس وکٹیں نہیں بچی ہیں۔انہوں نے کہا کہ بڑے میچ میں پریشر بڑی اہمیت رکھتا ہے کہ آپ کس طرح اسے ہینڈل کرتے ہیں اور وہ بھی اسی نکتے کو ذہن میں رکھے ہوئے تھے۔

بھارتی کپتان نے کہا کہ بھارتی فیلڈنگ پورے ٹورنامنٹ میں اچھی رہی ہر میچ میں ان کی ٹیم نے کم ازکم ایک رن آؤٹ ضرور کیا۔

مہندر سنگھ دھونی نے کہا کہ پاکستانی بولنگ بہت عمدہ رہی خصوصاً عمر گل نے بہت ہی اچھی بولنگ کی۔

دھونی نے کہا کہ ان کی بولنگ بیٹنگ سے زیادہ مستقل مزاج رہی۔ بیٹنگ میں چند ایک اچھی اننگز دیکھنے میں آئیں لیکن بولنگ نے پورے ٹورنامنٹ میں اپنا اثر قائم رکھا۔