دنیش کارتک نے اکیانوے رنز کی عمدہ اننگ کھیلی

جب کھیل ختم ہوا تو سچن تندولکر 48 جبکہ لکشمن 20 رن پر ناٹ آؤٹ تھے۔

میچ کا تفصیلی سکور کارڈ

تیسرے ٹیسٹ میں بھارت نے ٹاس جیت کر پہلے بیٹنگ کا فیصلہ کیا اور وسیم جعفر اور دنیش کارتک نے بھارتی اننگز کا آغاز کیا۔ ان دونوں بلے بازوں نے پہلی وکٹ کی شراکت میں باسٹھ رن بنائے۔

جعفر انڈیا کے آؤٹ ہونے والے پہلے کھلاڑی تھے جو کھانے کے وقفے سے قبل پینتیس رن بنا کر اینڈرسن کی گیند پر پیٹرسن کے ہاتھوں کیچ ہوئے۔ ابتدائی نقصان کے بعد کپتان راہول ڈراوڈ اور دنیش کارتک نے ذمہ دارانہ بلے بازی کا مظاہرہ کیا اور سکور کو ایک سو نواسی تک پہنچ دیا۔

اس موقع پر ڈراوڈ اپنی اڑتالیسویں ٹیسٹ نصف سنچری مکمل کرنے کے بعد پچپن کے انفرادی سکور پر جیمز اینڈرسن کی گیند پر بولڈ ہوگئے۔ کارتک اور ڈراوڈ کے درمیان 127 رن کی شراکت ہوئی۔

بھارت کی تیسری وکٹ 189 کے مجموعی سکور میں صرف دس رن کے اضافے کے بعد گری جب کارتک سائیڈ بوٹم کی گیند پر وکٹ کیپر پرائر کو کیچ دے بیٹھے۔ دنیش کارتک نو رنز کی کمی سے سنچری مکمل نہ سکے۔

کارتک کے آؤٹ ہونے کے بعد سورو گنگولی کریز پر آئے اور انہوں نے سچن تندولکر کے ساتھ مل کر انگلش بلے بازوں کے خلاف عمدہ سٹروک کھیلے۔ بھارت کی چوتھی وکٹ 276 کے مجموعی سکور پرگری جب گنگولی کو کالنگ وڈ کی گیند پر ایل بی ڈبلیو قرار دیا گیا۔

انگلینڈ کی جانب سے جیمز اینڈرسن نے دو جبکہ سائیڈ بوٹم اور کالنگ وڈ نے ایک ایک وکٹ حاصل کی۔

ٹرینٹ برج ٹیسٹ میں دونوں ٹیموں کے کھلاڑیوں میں تلخ کلامی اور انگلش کھلاڑیوں کے جیلی بین پھینکے جانے کے واقعات کے برعکس اوول میں برطانوی ٹیم کے کھلاڑی خاموش رہے اور انہوں نے محالف ٹیم کے بلے بازوں پر فقرے کسنے سے گریز کیا۔