مرلی دھرن نے 700 وکٹیں 113 ٹیسٹ میچوں میں حاصل کیں جبکہ شین وارن نےاس کے لیے 144 ٹیسٹ کھیلے

اس ٹیسٹ میں سری لنکا نے بنگلہ دیش کوایک اننگز اور 193 رنز سے شکست دی اور سیریز میں تین صفر سے وائٹ واش کیا۔

پہلی اننگز میں بنگلہ دیش 131 رنز پر آؤٹ ہوئی جس کے بعد سری لنکا نے چار وکٹوں پر 500 رنز بنا کر اننگز ڈیکلئیر کر دی۔ جواب میں بنگلہ دیش 176 پر آؤٹ ہو گئی۔

دوسری اننگز میں لنچ تک مہمان ٹیم کا سکور دو وکٹوں پر 106 رنز تھا لیکن لنچ کے بعد مرلی کی گھومتی ہوئی گیندوں کا جادو چل گیا اور دو وکٹوں پر 123 کے سکور سے آخری مجموعہ 176 تک ہی جا سکا۔

شہریار نفیس نے 64 رنز بنائے اور جاوید عمر کے ساتھ 47 رنز کی شراکت قائم کی۔ جاوید نے 22 رنز بنائے، انہیں ملنگا نے آؤٹ کیا۔ حبیب البشر کی خراب فارم کا سلسلہ جاری رہا اور وہ 15 رنز بنا سکے۔ انہیں مرلی نے بولڈ کیا۔

چار دنوں میں ختم ہو جانے والے اس میچ کے ہیرو مرلی دھرن تھے جنہوں نے دونوں اننگز میں چھ چھ وکٹیں حاصل کیں اور میچ میں 82 رنز کے عوض 12 کھلاڑیوں کو آؤٹ کیا۔

یہاں یہ بات دلچسپی سے خالی نہ ہوگی کہ 35 سالہ مرلی دھرن نے 600 وکٹوں سے 700 وکٹوں کا سفر صرف 12 ٹیسٹوں میں مکمل کیا۔ سات سو وکٹوں کا ریکارڈ مرلی دھرن نے کینڈی میں حاصل کیا جو ان کا آبائی شہر بھی ہے۔

نومبر میں سری لنکا کی ٹیم آسٹریلیا کا دورہ کرے گی اور دو ٹیسٹ کھیلے گی۔ مرلی دھرن جس رفتار سے وکٹیں حاصل کر رہے ہیں، کچھ بعید نہیں کہ وہ شین وارن کا عالمی ریکارڈ ان ہی کے ملک کے خلاف کھیلتے ہوئے توڑیں۔