راہول ڈاروڈ اور سورو گنگولی نے کوئی بین الاقوامی ٹوئنٹی ٹوئنٹی میچ نہیں کھیلا ہے

اس فیصلے پر انڈیا کے چیف سلیکٹر دلیپ وینگسارکر کا کہنا ہے کہ’میرے خیال میں وہ نوجوان کھلاڑیوں کو چانس دینا چاہتے ہیں‘۔ انہوں نے بتایا کہ راہول ڈراوڈ نے انہیں ٹیلیفون پر اس فیصلے سے مطلع کیا۔

یاد رہے کہ راہول ڈاروڈ اور سورو گنگولی نے کوئی بین الاقوامی ٹوئنٹی ٹوئنٹی میچ نہیں کھیلا ہے تاہم تندولکرگزشتہ دسمبر میں جنوبی افریقہ کے خلاف بھارت کے واحد بین الاقوامی ٹوئنٹی ٹوئنٹی میچ میں کھیلے تھے اور صرف دس رن بنا پائے تھے۔

ادھر ممبئی میں ہونے والے بی سی سی آئی کے اجلاس کے بعد ٹوئنٹی ٹوئنٹی ورلڈ کپ کے لیے بھارت کے ممکنہ تیس کھلاڑیوں کے ناموں کا اعلان کر دیا گیا ہے۔

ان تیس کھلاڑیوں میں دورۂ انگلینڈ کے لیے ٹیم میں شامل نہ کیے جانے والے اوپنر وریندر سہواگ اور سپنر ہربھجن سنگھ کو بھی شامل کیا گیا ہے۔تاہم لیگ سپنر انیل کمبلے اور بلے باز وی وی ایس لکشمن ممکنہ کھلاڑیوں کی فہرست میں جگہ بنانے میں ناکام رہے ہیں۔

ٹوئنٹی ٹوئنٹی ورلڈ کپ کے لیے حتمی ٹیم چھ اور سات اگست کو بی سی سی آئی کے اجلاس میں منتخب کی جائے گی اور تب ہی راہول ڈراوڈ کی عدم موجودگی کی وجہ سے نئے کپتان کا انتخاب بھی کیا جائے گا۔

جنوبی افریقہ میں کھیلے جانے والے ٹوئنٹی ٹوئنٹی ورلڈ کپ کا آغاز گیارہ ستمبر کو ہوگا اور یہ چودہ دن تک جاری رہےگا۔