عبدالرشید شکور
بی بی سی اردو ڈاٹ کام کراچی |  |
| | | جمیکن پولیس افسر مارک شیلڈز کے بیانات پر سوال اٹھائے جارہے ہیں |
پاکستانی کرکٹ ٹیم کے کوچ باب وولمر کے بارے میں یہ خبریں آنے کے بعد کہ اسکاٹ لینڈ یارڈ کے تفتیشی افسران کے مطابق انہیں قتل نہیں کیا گیا بلکہ یہ طبعی موت تھی، پاکستانی کرکٹرز اور آفیشلز کی جانب سے جمیکن پولیس کے خلاف شدید ردعمل سامنے آیا ہے۔ کہا جارہا ہے کہ جمیکن پولیس خصوصا وولمر کی موت کی تحقیقات کرنے والے افسر مارک شیلڈز کی جانب سے ’قتل‘ پر اصرار اور اس ’قتل‘ کے نت نئے طریقوں کے انکشافات سے پاکستانی ٹیم کو بدنامی کا سامنا کرنا پڑا۔ واضح رہے کہ ورلڈ کپ کے دوران اپنے ہوٹل کے کمرے میں مردہ پائے گئے باب وولمر کی موت کو قتل قرار دینے کے بعد جمیکن پولیس اس کیس کو مختلف پہلوؤں سے آگے بڑھانے کے باوجود کسی نتیجے پر نہیں پہنچ سکی ہے۔ ورلڈ کپ میں پاکستانی کرکٹ ٹیم کے کپتان انضمام الحق نے بی بی سی سے بات کرتے ہوئے کہا: ’میرے سترہ سالہ بین الاقوامی کریئر میں وہ گیارہ دن انتہائی سخت اور مشکل تھے اور اس مشکل گھڑی میں پاکستان سے کسی نے فون کرکے ہمت نہیں بڑھائی اور نہ پوچھا کہ ٹیم کس حالت میں ہے۔ کسی انٹرنیشنل ٹیم کے ساتھ روا رکھا جانے والا یہ انتہائی نامناسب سلوک تھا۔‘ |  جب تحقیقات شروع ہوئی تو پاکستانی ٹیم نے ہر ممکن مدد کی۔ مقصد صرف یہی تھا کہ ہمارے بیان سے حکام کو مدد ملے لیکن تحقیقات کا دوبارہ شروع کرنا اور کرکٹرز کی دوبارہ بیانات کے لئے طلبی جائز نہیں تھی۔ یہ تو ہمیں بعد میں اندازہ ہوا کہ ہم پر ہی شک کیا جارہا ہے۔  انضمام الحق |
سابق کپتان نے اس سوال پر کہ اگر سرکاری رپورٹ وولمر کی موت کو طبعی قرارد یتی ہے تو کیا آپ عدالت سے رجوع کرینگے، جواب دیتے ہوئے کہا: ’اس کا کوئی فائدہ نہیں ہے کیونکہ کرکٹرز پر جو مشکل وقت تھا وہ گزرگیا، البتہ اس بات پر ضرور زور دینگے کہ کرکٹ بورڈ اور حکومت کے لوگوں کو اس طرح کی حکمت عملی بنانی چاہئے کہ اس طرح کی صورتحال سے کیسے نمٹاجائے۔ وہ دعا کرتے ہیں کہ ایسا وقت پھر نہ آئے۔‘ پاکستان کرکٹ بورڈ کے سابق سربراہ لیفٹننٹ جنرل ( ریٹائرڈ) توقیر ضیا کا کہنا ہے: ’جمیکن پولیس اس معاملے کو صحیح طور پر ہینڈل کرنے میں ناکام رہی۔ اس کے علاوہ بھارتی میڈیا کی منفی خبروں نے بھی جلتی پہ تیل کا کام کیا۔‘ توقیرضیا اس بات پر زور دیتے ہیں کہ باب وولمر کی موت طبعی قرار دینے کے بارے میں باضابطہ رپورٹ آنے کے بعد کرکٹرز کو ان افراد کے خلاف ضرور قانونی چارہ جوئی کرنی چاہیئے جنہوں نے ان پر سنگین نوعیت کے الزامات عائد کیے۔‘ توقیرضیا کے برعکس پاکستان کرکٹ بورڈ کے ایک اور سابق سربراہ شہریارخان عدالتی چارہ جوئی کے حق میں نہیں۔ ان کا کہنا ہے: ’حالات و واقعات کو دیکھتے ہوئے تحقیقات کی گئی لیکن اس بات سے انکار نہیں کہ یہ صورتحال پاکستانی کرکٹرز کے لئے اذیت ناک تھی جس پر پاکستان کرکٹ بورڈ کو چاہیئے کہ وہ جمیکن حکومت اور آئی سی سی سے باضابطہ شکایت کرے اور معافی طلب کرے۔‘ پاکستان کرکٹ بورڈ سے طویل عرصے مختلف حیثیتوں میں وابستہ رہنے والے عارف علی خان عباسی پاکستانی کرکٹرز کے ساتھ نامناسب سلوک کو پاکستان کرکٹ بورڈ کے موجودہ افسران بالا کی کمزوری قراردیتے ہیں۔ ان کا کہنا ہے کہ ’یہ سب کچھ اس لئے ہو رہا ہے کہ پاکستان کرکٹ بورڈ آئی سی سی میں اپنی اہمیت کھوبیٹھا ہے۔‘ پاکستانی کرکٹ ٹیم کے سابق کپتان عمران خان نے بھی انگلینڈ کے ایک اخبار کو انٹرویو میں پاکستان کرکٹ بورڈ سے مطالبہ کیا ہے کہ وہ کرکٹرز کے ساتھ جمیکن پولیس کے مبینہ ہتک آمیزسلوک کا سختی سے نوٹس لے۔ عمران خان نے باب وولمر کی موت کو میچ فکسنگ سے جوڑنے والوں کے خلاف بھی کارروائی کا مطالبہ کیا ہے۔ | 
ایشیا کپ، سہیل اور وسیم دستیاب
