’موت کو قتل قرار دینے میں جلدبازی کی گئی‘

باب وولمر کا ’قتل‘: خصوصی ضمیمہ

اخبار ڈیلی میل نے کہا ہے کہ جمیکا کے تفتیش کار آئندہ ہفتے ایک پریس کانفرنس میں اعلان کریں گے کہ باب وولمر کا انتقال حرکت قلب بند ہونے سے ہوا ہے جس کا محرک انتہائی خراب صحت یا ذیابیطس کا مرض ہو سکتا ہے۔

اٹھاون سالہ وولمر مارچ اٹھارہ کو کنگسٹن میں پاکستانی ٹیم کی آئرلینڈ کے ہاتھوں شکست کے اگلے روز اپنے ہوٹل کے کمرے میں مردہ پائے گئے تھے۔ ان کی موت کی وجہ کے بارے میں مختلف آراء کا اظہار کیا گیا تھا۔

ڈیلی میل کی خبر میں کہا گیا ہے کہ لندن میٹروپولیٹن پولیس کے تجزیے کے بعد جمیکا کی پولیس کے افسران نجی طور پر متفق ہیں کہ وولمر کی موت میں کسی کاہاتھ نہیں ہے۔

اخبار نے لکھا ہے کہ جمیکا کی پولیس کے ڈپٹی کمشنر مارک شیلڈز کے لیے، جنہوں نے تفتیش کی سربراہی کی تھی، مشکل وقت شروع ہونے والا ہے۔ اخبار نے جمیکا پولیس کے ایک اہلکار کے حوالے سے بتایا کہ بادی النظر میں ہمیں ایک اور پوسٹ مارٹم کروانا چاہیے تھا۔ اہلکار نے کہا کہ شیلڈز نے موت کو مشکوک قرار دینے کی بجائے اسے قتل قرار دینے میں جلد بازی کی۔