عبدالرشید شکور
بی بی سی اردو ڈاٹ کام کراچی |  |
| | | صالح محمد پر حال میں افغانستان کی نمائندگی کا الزام لگایا گیا ہے |
سندھ ہائی کورٹ نے سنوکر کے انٹرنیشنل کھلاڑی صالح محمد کی شہریت کے بارے میں دائر درخواست پر ایف آئی اے کو ہدایت کی ہے کہ وہ تحقیقات کر کے بتائے کہ صالح محمد افغان شہری ہیں یا نہیں۔ واضح رہے کہ ایک شہری جاوید اختر نے پٹیشن دائر کی تھی جس میں کہا گیا تھا کہ صالح محمد کافی عرصے سے پاکستان میں مقیم ہیں اور قومی اور بین الاقوامی مقابلوں میں پاکستان کی نمائندگی کر رہے ہیں لیکن گزشتہ سال وہ اچانک افغانستان چلے گئے اور دوحا ایشین گیمز میں افغانستان کی نمائندگی کی۔ لیکن اس کے بعد پاکستان واپس آکر انہوں نے پاکستان بلیئرڈز اینڈ سنوکر ایسوسی ایشن سے معافی مانگی جو قبول کرلی گئی اور انہیں قومی رینکنگ ٹورنامنٹ میں حصہ لینے دیا گیا۔ اب انہیں ایشین سنوکر چیمپئن شپ میں پاکستان کی نمائندگی کے لیے منتخب کرلیا گیا ہے جو گیارہ جون سے کراچی میں شروع ہورہی ہے۔ پٹیشنر کا کہنا ہے کہ صالح محمد کا یہ قدم پاکستان کے شہری قوانین کی خلاف ورزی پر مبنی ہے لہذا انہیں ایشین سنوکر چیمپئن شپ میں پاکستان کی نمائندگی سے روکا جائے۔ پٹیشن میں یہ استدعا بھی کی گئی ہے کہ پاکستانی شہری قوانین کے تحت کوئی بھی افعانستان کی دوہری شہریت نہیں رکھ سکتا۔ سندھ ہائی کورٹ کے جسٹس منیب احمد خان اور جسٹس امیر ہانی مسلم پر مشتمل بینچ نے بدھ کو اس درخواست پر وفاقی تحقیقاتی ادارے ایف آئی اے کو ہدایت کی کہ وہ صالح محمد کی شہریت کے بارے میں چھان بین کر کے بتائے کہ وہ پاکستانی شہری ہیں یا افغانی۔ پٹیشن میں پاکستان بلیئرڈز اینڈ سنوکر ایسوسی ایشن کی طرف سے خواجہ نوید ایڈوکیٹ اور وفاق کی طرف سے مسز صوفیہ سعید شاہ پیش ہوئیں۔ | 
ایشیا کپ، سہیل اور وسیم دستیاب
