ایفرو ایشیا کپ اس سے پہلے سن دو ہزار پانچ میں کھیلا گیا تھا

ٹورنامنٹ کا انعقاد اس وقت مشکوک ہو گیا تھا جب اہم کھلاڑیوں کی طرف سے اس میں حصہ نہ لینے کے اعلان کے بعد نمبس سپورٹس نے ٹورنامنٹ سے علیحدگی کا کہہ دیا تھا۔ ایشیائی کرکٹ کونسل کے سربراہ سید اشرف الحق نے بی بی سی سپورٹس کو بتایا کہ نمبس سپورٹس کے ساتھ معاہدہ ختم ہو گیا ہے۔

تین میچوں کی سیریز میں ایشیا کی طرف سے سچن تندولکر، راہول ڈراوڈ، مرلی تھرن، چمندا واس، لیستھ ملنگا اور شعیب اختر حصہ نہیں لے رہے۔ افریقہ کی ٹیم میں گریم سمتھ اور ژاک کالس شامل نہیں ہوں گے۔

ٹورنامنٹ بنگلور اور مدراس میں کھیلا جائے گا۔ پہلا میچ آئندہ منگل کو اور اگلے دو میچ نو اور دس جون کو ہوں گے۔

ایشیائی کرکٹ کونسل کے سربراہ نے ان کھلاڑیوں کو تنقید کا نشانہ بنایا جو فٹنس کے علاوہ کسی اور وجہ سے ٹورنامنٹ میں نہیں آ رہے۔ انہوں نے کہا کہ جن کو کرکٹ کو اتنا کچھ دیا ہو انہیں کچھ واپس بھی کرنا چاہیے۔

یہ نہیں بتایا گیا کہ ای ایس پی این سپورٹس ٹورنامنٹ کے میچ دکھانے کا کتنا معاوضہ لے رہا ہے لیکن خیال یہی ہے کہ یہ اس سے کم ہوگا جو نمبس سپورٹس نے ادا کرنا تھا۔

ایفرو ایشیا کپ کا خیال پہلی بار سن دو ہزار پانچ میں انڈیا کرکٹ بورڈ کے سابق سربراہ جگموہن ڈالمیا نے پیش کیا تھا اور اس کے میچ نشر کرنے کے حقوق نمبس سپورٹس کو ایک کروڑ بارہ لاکھ ڈالر میں فروخت کیے گئے تھے۔

نمبس نے کہا کہ بڑے کھلاڑیوں کی عدم موجودگی میں اس ٹورنامنٹ میں بہت کم عوامی دلچسپی ہے اور یہ کاروباری لحاظ سے فائدہ مند نہیں تھا۔

نمبس کے فیصلے سے ایک روز قبل ہی زی ٹی وی نے جنوبی افریقہ اور انڈیا کے درمیان آئرلینڈ میں ہونے والی تین میچوں کی سیریز دکھانے سے معذرت کر دی تھی۔ زی ٹی وی میچوں کی نشریات کے معاوضے کے از سر نو تعین کے بغیر دور درشن کے ساتھ مِل کر پروگرام دکھانے پر تیار نہیں تھا۔