عبدالرشید شکور بی بی سی اردو ڈاٹ کام، کراچی

	اختر اورآصف کی جگہ محمد سمیع اور یاسر عرفات کو ٹیم میں شامل کیا گیا ہے

آئی سی سی کو باضابطہ درخواست بھیجنے میں تاخیر ہوئی ہے لیکن اس کی وجہ یہ بیان کی جا رہی ہے کہ پاکستان کرکٹ بورڈ کو شعیب اختر اور محمد آصف کی میڈیکل رپورٹیں پیر کی شب ملی ہیں۔

پاکستان کرکٹ بورڈ نے یکم مارچ کو عین اس وقت جب پاکستانی ٹیم ویسٹ انڈیز روانہ ہونے والی تھی یاسرعرفات اور محمد سمیع کو اس جواز کے تحت ٹیم میں شامل کیا تھا کہ شعیب اختر اور محمد آصف ان فٹ ہیں لہذا آئی سی سی کو ان دونوں کی میڈیکل رپورٹس بھیجنی بھی ضروری ہے۔

پاکستانی کرکٹ بورڈ کے ترجمان کا کہنا ہے کہ محمد آصف اور شعیب اختر کی میڈیکل رپورٹس فوری طور پر محمد سمیع اور یاسرعرفات کی ٹیم میں شمولیت کی درخواست کے ساتھ آئی سی سی کو بھیجی جارہی ہیں۔

آئی سی سی کے ترجمان سمیع الحسن کا کہنا ہے کہ درخواست ملتے ہی آئی سی سی کی ٹیکنیکل کمیٹی اس کا جائزہ لے گی۔ ٹیکنیکل کمیٹی اس سے قبل ان فٹ عبدالرزاق کی جگہ اظہرمحمود کی پاکستانی ٹیم میں شمولیت کو منظوری دے چکی ہے۔

محمد سمیع پیر کی شب ویسٹ انڈیز کےلیے روانہ ہوں گے جبکہ یاسرعرفات کی روانگی دو روز میں متوقع ہے۔ پاکستان کرکٹ بورڈ کے ترجمان کا کہناہے کہ یاسرعرفات کے ڈوپ ٹیسٹ کی رپورٹ منگل کو موصول ہوجائےگی۔