عبدالرشید شکور بی بی سی اردو ڈاٹ کام، کراچی

	بورڈ نے دو کمیٹیاں بنا کر معاملہ اور متنازعہ بنا دیا ہے: رمیز

ورلڈ اینٹی ڈوپنگ ایجنسی ( واڈا) نے پاکستان کی ڈوپنگ اپیل کمیٹی کی جانب سے شعیب اختر اور محمد آصف کو بری کیے جانے کو تسلیم نہ کرتے ہوئے اسے کھیلوں کی ثالثی عدالت میں چیلنج کرنے کا فیصلہ کیا ہے۔

رمیز راجہ جو اس وقت کمنٹری کے شعبے سے وابستہ ہیں کہتے ہیں کہ پاکستان کرکٹ بورڈ نے اس معاملے کو صحیح طریقے سے نہ نمٹتے ہوئے دو کمیٹیاں بناکر اسے متنازعہ بنادیا اور اب جبکہ واڈا نے بھی اسے چیلنج کرنے کا فیصلہ کیا ہے تلوار پاکستانی بولرز کے سر پر لٹکی ہوئی ہے۔

رمیز راجہ پہلے بھی یہ بات کہہ چکے ہیں کہ پاکستان کرکٹ بورڈ نے دونوں بولرز کو جو سزا دی وہ بہت سخت اور غیرضروری تھی۔

پاکستان کرکٹ بورڈ نے ڈوپنگ کے معاملے کو صحیح طریقے سے نہ نمٹتے ہوئے دو کمیٹیاں بناکر اسے متنازعہ بنادیا رمیز راجہ

ان کا کہنا ہے کہ اس صورتحال کے نتیجے میں پاکستانی کرکٹ سکروٹنی کی زد میں آگئی اور بولرز پر بھی ساری زندگی یہ دھبہ لگا رہے گا۔

رمیز راجہ کا کہنا ہے کہ کپتان انضمام الحق کے نزدیک ورلڈ کپ اولین ترجیح ہے اور وہ نہیں چاہیں گے کہ ورلڈ کپ کے موقع پر اس مسئلے میں الجھے رہیں۔ ’ساتھ ہی یہ بھی دیکھنا ہوگا کہ ان دونوں بولرز کی ذہنی حالت کیسی ہے کیونکہ اس طرح کی صورتحال میں کھلاڑی جسمانی طور پر نہیں ذہنی طور پر بہت زیادہ ڈسٹرب ہوجاتا ہے دونوں کو اس کیفیت سے نکال کر کرکٹ کی طرف لانے کے لیے ڈریسنگ روم کا خوشگوار ماحول اہم کردار ادا کرے گا‘۔