عبدالرشید شکور بی بی سی اردو ڈاٹ کام، ملتان

	اگست میں ہونے والے ساؤتھ ایشین گیمز میں دونوں باکسرز نے طلائی تمغے جیتے تھے

مہراللہ ایشین گیمز میں گولڈ میڈلسٹ ہیں اور وہ پر امید تھے کہ دوحا میں وہ پاکستان کی نمائندگی کرتے ہوئے طلائی تمغہ جیت جائیں گے۔

اس سال اگست میں ہونے والی ساؤتھ ایشین گیمز میں دونوں باکسرز نے طلائی تمغے جیتے تھے تاہم ان کے ہونے والے ڈوپ ٹیسٹ مثبت پائے گئے تھے۔

مہراللہ اور فیصل کریم کو ممنوعہ ادویات کے استعمال پر اپنی صفائی کے لیے کولمبو جانا پڑا جہاں وہ متعلقہ حکام کو مطمئن کرنے میں کامیاب نہ ہو سکے تھے۔

پاکستان باکسنگ فیڈریشن کے سیکریٹری شکیل درانی کے مطابق مہراللہ اور فیصل کریم کی جگہ ذاکر حسین اور ساجد راجہ کو ایشین گیمز میں نمائندگی کے لیے پاکستانی باکسنگ سکواڈ میں شامل کرلیا گیا ہے۔

شکیل درانی نے بتایا کہ پاکستان باکسنگ فیڈریشن کا اجلاس اتوار کو ہوگا جس میں مہراللہ اور فیصل کریم کے خلاف مزید کارروائی کرنے کے بارے میں غور کیا جائے گا۔

یاد رہے کہ دوسال قبل اسلام آباد میں ہونے والے ساؤتھ ایشین گیمز میں فیصل کریم کے بھائی نعمان کریم بھی ممنوعہ ادویات کے استعمال کے مرتکب پائے گئے تھے اور ان سے نہ صرف طلائی تمغہ واپس لے لیا گیا تھا بلکہ ایک سال کی پابندی بھی عائد کردی گئی تھی۔