عبدالرشید شکور بی بی سی اردو ڈاٹ کام، کولمبو

	جوالا گتہ کہتی ہیں کہ بھارتی کھلاڑی اس وقت بین الاقوامی مقابلوں میں اچھے نتائج دے رہے ہیں

جوالا گتہ کا تعلق حیدرآباد دکن سے ہے جہاں کی مزے دار بریانی بہت مشہور
ہے لیکن جوالا گتہ کہتی ہیں’میری والدہ چینی ہیں۔ ہمارے گھر میں زیادہ مصالحے دار کھانے نہیں بنتے تو میں تیز مرچ مصالحے والے کھانے نہیں کھاسکتی‘۔

بیڈمنٹن جوالا کے لیئے گھر کی بات ہے۔ اُن کے شوہر چیتن آنند بھی بیڈمنٹن کے مشہور کھلاڑی ہیں اور اس وقت عالمی رینکنگ میں بیسویں نمبر پر ہیں۔ آنند نے بھی دسویں ساؤتھ ایشین گیمز میں دو گولڈ میڈلز جیتے۔

جوالا گتہ کا کہنا ہے کہ بھارت میں کرکٹ کا جنون ہے لیکن بیڈمنٹن کو بھی بہت پذیرائی ملتی ہے۔ گوکہ سپانسرشپ اتنی زیادہ نہیں ہے لیکن حکومت اور ایسوسی ایشنز کا کردار ہمیشہ سے اہم رہا ہے اسی لیئے بھارتی کھلاڑی ہر بڑے بیڈمنٹن ٹورنامنٹ میں نظر آئیں گے۔

جوالا گتہ کہتی ہیں کہ بھارتی کھلاڑی اس وقت بین الاقوامی مقابلوں میں اچھے نتائج دے رہے ہیں۔ گزشتہ سال انہوں نے دجو والیا کے ساتھ دو ٹورنامنٹس جیتے۔ کامن ویلتھ گیمز میں عالمی نمبر پانچ کو شکست دی۔

ابھی میں نوجوان ہوں اور کم ازکم چار سال آسانی سے انٹرنیشنل بیڈمنٹن کے مقابلوں میں حصہ لے سکتی ہوں۔ اگر کارکردگی اور فٹنس اچھی رہی تو یہ عرصہ لمبا بھی ہوسکتا ہے جوالا گتہ

ان کا کہنا تھا کہ ابھی وہ نوجوان ہیں اور کم ازکم چار سال آسانی سے انٹرنیشنل بیڈمنٹن کے مقابلوں میں حصہ لے سکتی ہیں۔ اگر کارکردگی اور فٹنس اچھی رہی تو یہ عرصہ لمبا ہوسکتا ہے۔ فی الحال آنے والے چار سال ان کے لیئے بہت اہم ہیں۔

جوالا کو بیجنگ اولمپکس کا بھی شدت سے انتظار ہے۔ چین میں ان کے رشتے دار رہتے ہیں۔ جوالا کو یقین ہے کہ جب کورٹ میں اتریں گی تو وہ ان کی حمایت کریں گے۔